Taǵdyr ma, álde zaman ba

mańdaıǵa syzǵan tańbasyn,

Jazbaıyn desem janǵa aýyr,

aıtpaıyn desem arǵa syn.

Jatqa ketken jerimde,

jan baýyrym bar edi,

Qylburaý tústi-aý moınyńa,

qytaıda qalǵan qandasym!

Atajurt - altyn besigiń,

sharshasań súıer arqańdy,

Arqardaı alshań bastyrǵan

mańyrap jetken marqańdy.

Uzyn arqan, keń tusaý

bolar dep beıqam júrdiń be,

"Týǵan jer - altyn tuǵyr" dep,

qıa almaı altyn Altaıdy?

Jyldarǵa kómip saǵynysh,

júrekke sherin taǵady Aı,

Jánibek alǵan Qara Ertis

býynyp, jylap aǵady aı.

Bóriler jortqan boz dala eń,

qaptady-aý qara qumyrsqa,

Ýystan shyǵyp ór Altaı,

qaıyrylmaı ketip barady-aı!

Júrekti nemen jubatam,

ýaqyt, óziń aıt emin,

Eshteńege qaramaı,

esiń barda qaıt, elim!

Temir noqta kıilip,

dil men tilden ajyrap

- jáýdiregen qara kóz

"hanzý" bop ketse qaıtemin?..

Saıasat degen saıqaldyń

túıini bar ma sheshilmes?

Aldyńda Atajurtyń bar:

azanda kósh, besin kósh.

Sen joǵaltsań bizderdi,

biz joǵaltsaq senderdi,

Balbal tas bolyp sóıleıtin,

kári tarıh keshirmes!

Taǵdyr ma, álde zaman ba

mańdaıǵa syzǵan tańbasyn,

Jazbaıyn desem janǵa aýyr,

aıtpaıyn desem arǵa syn.

Kúıińdi kórip kúıinem,

únińdi estip egilem,

Hatymdy oqyp elge jet,

qytaıda qalǵan qandasym!

Erbol Beıilhan. 21.01.2018 j.