Almaty qalasy kásipkerler palatasyna bıznesmender qalanyń qurylymdyq kórkin jańǵyrtýdan zardap shegip otyrǵanyn aıtty, dep jazady Qamshy.kz aqparat agenttigi. 

Qala turǵyndaryna 1969 jyldan beri tanys bolǵan «Vosqod» saýda úıiniń dırektory Iýrıı Kovtýn búginde dúken birte-birte shyǵynǵa ushyrap otyrǵanyna shaǵymdandy. Saýda jaǵy óte tómen. Sońǵy 3 aıda jalǵa alýshylardyń 17% bas tartqan.

«Máseleniń barlyǵy bizdiń ǵımarattyń janyna velosıped jolaǵy jasalǵannan bastaldy. Kólik qoıatyn oryn joq. Klıentterdiń kelýi kúrt tómendedi. Biz ákimdikten eń bolmaǵanda joldyń arǵy betinen aqyly avtoturaq jasaýǵa ótinish bildirdik. Biraq kelispedi. Biz qalanyń abattandyrylýyna qarsy emespiz. Biraq bizde qansha adam velosıped tebedi?!» - dep shaǵymdandy Iýrıı Kovtýn.

«Koreıa» kafesiniń ıesi Nellı Nıgaı «toqtaýǵa bolmaıdy» belgisiniń kesirinen dámhanaǵa kelýshiler sany azaıǵanyn, tipti ǵımaratty sata da almaı otyrǵanyn jasyrmady. Tabys 30%-ǵa tómendegen. Qyzmetkerlerdiń jartysy jumystan shyǵaryldy. Al «Maqpal» respýblıkalyq sán ortalyǵynyń jetekshisi Bazılá Ábilmanovanyń aıtýynsha birinshi toptaǵy múgedek qyzmetker jumystan shyqqan, sebebi onyń jumysqa qatynaýy qıyndaǵan.

Kásipkerler palatasyna osyndaı máselemen bıznestiń 95 sýbektisi shaǵymdandy. Másele Kásipkerlerdiń quqyǵyn qorǵaý keńesine shyǵarylyp, jıynǵa zardap shekkkender de shaqyrtyldy, sondaı-aq jergilikti atqarýshy organnyń ókilderi de keldi. Shaǵymdanǵan kásipkerlerdiń aldynda Almaty qalasy İshki ister departamenti Ákimshilik polısıa basqarmasynyń basshysy Jandolla Shaıhıevke jaýap berdi.

«Almatyda 530 myń kólik quraly bar. Sonymen qatar syrttan kelýshiler, ásirese oblystan qatynaıtyndar bar. Avtokólikter – aýa lastanýynyń basty sebepshisi. Kásipkerlerdi de túsinemiz. Avtoturaq jobasymen biz aınalyspaımyz. Bizge tek kelisýge alyp keledi. Eger sáıkes kelmese, kólik quraldarynyń turaǵyna ruqsat bere almaımyz. Eger qandaıda bir uıym avtoturaqqa qatysty naqty usynys alyp kelse, biz baryp kóremiz. Bastysy usynylǵan nusqa jol qozǵalysynyń basqa da qatysýshylaryna kedergi keltirmeýi tıis», - dep oı bólisti Jandola Shaıhıev.

Kásipkerlerdiń quqyǵyn qorǵaý keńesiniń músheleri jalpy alǵanda qala turǵyndary abattandyrýdy qoldaıtyndyǵyn atap ótti. Alaıda Almaty – shaǵyn jáne orta bıznestiń qalasy. Munda iri kásiporyndar joq. Kásipkerler tóleıtin salyq qala búdjetiniń negizgi bóligin quraıdy. Sondyqtan abattandyrýǵa qatysty sharalardy bıznespen kelisý kerek.