Aqtóbe oblysyndaǵy órt shyqqan avtobýstan qaza tapqan ózbekstandyq eki turǵyn Qazandaǵy túrik kompanıasynyń qurylys nysanyna bara jatqan. Bul týraly «Ózbekstan Jańalyqtary» habarlaıdy.

Jergilikti tilshiler qaza tapqandardyń týystarymen tildesip qaıtty. Hýsnıddın Isomıddınov eki nemeresinen birdeı aıyryldy. Qarıa úshin bul qaza aýyr tıdi..

Qaza tapqan jigitterdiń úlkeni Shohrýh Zakırov 20 jasta, al týys inisi Mýhamaddın Hýsnıddınov 19 jasta.

Shohrýh Zakırov

Shohrýhtyń ákesiniń aıtýynsha, ol byltyr túrik kompanıasyna baryp, qomaqty qarjy taýyp kelgen. Osy jyly ózimen inisi men eki dosyn da ertip alǵan.

«Jıenderimniń Reseıge attanyp bara jatqanyn olar ketip qalǵannan keıin biraq bildim. Al beısenbide avtobýstyń órtengeni jaıly habar estidik. Onda Shohrýh pen Mýhammaddınniń bolǵanyna áli de sene almaımyn. Aǵam men ápkeme uldarynyń qazasyn qalaı jetkizerimdi oılap, túni boıy kóz ilmeı shyqtym», - dedi qaza tapqan balalardyń aǵasy Mýhammaddsolı Zıevıddınov.

Mýhammadın Hýsnıddınov (sol jaqta)

Al jigitterdiń biriniń ákesi Tohırjon Rahımovtyń otbasyna qaraly habardy ýchaskelik polıseı habarlaǵanyn aıtty. Polıseıdiń aıtqanyna senbegen áke men ana qaza tapqandardyń tizimi jazylǵan resmı derek shyqpaıynsha úmitterin úzbegen. Sebebi órtengen avtobýsta otyrǵan Ózbekstannyń bir turǵyny apattan buryn basqa avtobýsqa aýysyp, aman qalǵan.

Qaıtys bolǵan Mýhammıdın dánekerleýshi bolyp nápaqasyn taýyp júrdi. Turaqorǵan áleýmettik-ekonomıkalyq jáne sport kolejin bitirgen, trener bolýdy armandaǵan. Karatemen shuǵyldanyp, túrli jarystardan júldeli oryndar alyp júrgen.

Shohrýh ta sol kolejiń stýdenti boldy. Keıin tehnologıa salasy boıynsha oqýyn jalǵastyrdy. Ol da sportpen shuǵyldanǵan.

Týystarynyń aıtýynsha, Shohıdon elde jumys tabylmaǵandyqtan Reseıge ketken. Turaqty jumys tabý da qıyn, ýaqytsha tabystarmen kúneltýge týra keledi.

Qaza tapqan jigitterdiń eki baýyry bolǵan.

Aıta keteıik, Aqtóbe oblysynyń Yrǵyz aýdanynda avtobýs órtenip, sonyń saldarynan 52 adam qaza tapqan. Bes azamat aman qaldy, onyń ekeýi Ózbekstan azamaty bolsa, úsheýi qazaqstandyq. Al qaza tapqandardyń bári Ózbekstan azamattary.