Reıtıń degen bar qazir. Syn men sapanyń zamanaýı ólshemi bolyp tur. Osy reıtıń qazaq baspasózine qazylǵan or ispetti. Sebebi memlekettik satyp alýshylar men jarnama berýshilerge ótkir aıtyp, oza jazǵanyńnan, aqıqatyn aıǵaılatyp, ashyndyra aıtqanyńnan góri oı qorytpasa da oqyrmannyń men kórermenniń kóp bolǵany ǵana qajet. Ol tipti sizdiń baspasózińizdiń ne týraly jazatynyn bilmeýi de múmkin. Qazirgi reıtıń júıeleri sondaı, aıtyp jazǵanyńnyń salmaǵyn, yqpaly men nátıjesin emes bas suqqannyń sanyn ǵana ólsheıdi. Alaıda ókpemiz reıtıń júıesine emes, sondaı reıtıńpen jumys isteıtinderge.

Qazaqstanda biz biletin reıtıń ólsheýshi — saıttarda zero.kz bolsa telearnalardy TNS Central Asia kompanıasy. Qazaqsha saıttardy ólshep júrgen «Sanaq» jobasy toqyrap tyndy. «Zero-nyń» bir kemshiligi tek qazaqstandyq provoıderlerden keletin IP sanyn esepteıdi de qazaqstandyq saıttardyń sheteldik oqyrmandaryn esepke almaıdy. Onyń málimetteriniń Google Analytics derekterimen ylǵı da qarama-qaıshy shyǵatynynan-aq kóp nárseni ańǵarýǵa bolady. Ekinshi kemshiligi jazylýshylarynyń ótken reıtıńin esepke almaıdy. Iaǵnı oǵan tirkelgen saıt tek 24 saǵattaǵy óz reıtıńin, sońǵy bir aıǵa deıingi barlyq saıttardyń jalpy reıtıńin ǵana kóre alady.

20 jyldan beri Qazaqstandyq telearnalardyń reıtıńin ólshep kele jatqan  TNS Central Asia. Onyń quryltaıshylary Gallup Media jáne Gallup AdFact atty reseılik kompanıalar. Osydan soń-aq ary qaraıǵy áńgimeniń qajeti joq shyǵar. Atalǵan reıtıń ólsheýshiler qanshalyqty dáldikpen, ádildikpen ólsheıdi? Ol jaǵy bir táńirge aıan. Úkimetke de aıan deıtin edik, Aqparat jáne komýnıkasıalar mınıstrliginiń baspasóz qyzmeti reıtıń ólsheıtin mekemelerdiń óz quzyreti sheginde baqylanbaıtyndyǵyn habarlady. Iaǵnı baǵa bergishterdiń búıregi kimge bursa da, ondyqty opyryp kimge berse de óz erkinde.

Alaıda, Memlekettik satyp alýshylar nendeı sebepke negizdelip, joǵarydaǵy kompanıalardyń statısıkasyn suraıdy? Olardyń kórsetkishi memlekettik tapsyrysta ne nársege negizdelip mindetteledi? Bul suraqqa Aqparat mınıstrliginen tómendegideı jaýap keldi.

«Memlekettik tapsyrys Qazaqstan Respýblıkasy Aqparat jáne komýnıkasıalar mınıstriniń 2017 jylǵy 28 aqpandaǵy № 75 buıryǵymen bekitilgen «Respýblıkalyq deńgeıde memlekettik aqparat saıasatyn júrgizý jónindegi memlekettik tapsyrysty ornalastyrý qaǵıdalaryna» sáıkes buqaralyq aqparat quraldary arasynda ornalastyrylady.

Memlekettik tapsyrystyń ınternet-resýrstardy baldyq baǵalaý júıesine sáıkes, ár tapsyrysqa qatysýshy saıttyń aılyq qaraý sanyn rastaıtyn anyqtamany konkýrs qujattarymen qosa komısıanyń qaraýyna usyna alady. Alaıda, konkýrstyń bul talaby qatysýshylarǵa mindettelmeıdi, jáne de bundaı anyqtama usynylmaǵan jaǵdaıda, atalǵan kórsetkish boıynsha ǵana qatysýshy-ınternet-resýrs baǵalanbaıtyndyǵyn atap ótemiz.

Sonymen qatar, memlekettik tapsyrysqa qatysýdyń shartyna sáıkes ár qatysýshy saıttyń aılyq kórsetkishin óz tańdaýy boıynsha kez-kelgen reıtıń ólsheıtin mekemeniń anyqtamasymen bekite alady jáne de bul jerde Mınıstrlikpen eshqandaı shekteý qoıylmaǵan.

Memlekettik tapsyrystyń joǵaryda atalǵan baldyq baǵalaý júıesindegi kórsetkishi otandyq ınternet keńistigindegi ınternet-resýrstardyń arasyndaǵy básekege qabilettilikti arttyrý maqsatynda jasalynǵan shara bolyp tabylady», degen mınıstrlik jaýabynda.

Hosh deńiz. Memlekettik satyp alý júıesinde basty kózir dál sol aılyq kórsetkish ekenin mınıstrlik bilmeı me? Trafık aǵyny men reıtıń úshin sary basylym deńgeıindegi kontentke jutylyp bara jatqan basylymdardyń obaly kimge? Reıtıń degenge baqylaý bolmaǵan soń BAQ irip, Memlekettik satyp alý sasyp ketpese bolǵany.