Qazaqqa aıran dep, sý qosylǵan shalapty satatyn túrik dámhanalary jaıly Aınur Tóleý esimdi Facebook qoldanýshysy jazdy. Aınurdyń aıtýynsha qazaqtyń dúnıetanymyna ǵasyrlar boıy aıran dep sińgen ulttyq sýsyndy túrikter birneshe jyldyń ishinde sý qosylǵan suıyqtyqpen aýystyryp jiberip otyr.

"Qazaqtyń aırany qoıý, sútti eppen uıýtýdyń nátıjesinde paıda bolatyn qoımaljyń as. Birneshe jyl boldy túrikter dónerlerimen birge aıran dep sý qosylǵan aq suıyqtyqty usynady. Bizdiń jaqta maltany sýǵa ezý arqyly, nemese dorbadaǵy qatyqty ezý arqyly sondaı suıyqtyq jasaýshy edi. Ony biz shalap dep ataıtynbyz. Endi suraq túrikter suıyq shalapty aıran dep aıtqany úshin nege biz de ony aıran dep ataýymyz kerek. Bizdiń elge kelip, kásipterin júrgizip, sonymen qatar bizdiń dúnıetanymymyzdy osylaı-op-ońaı ózgerte bere me? Mynaýyń aıran emes, shalap qoı dep aıtqandaryńyz bar ma? Álde aıran dep satyp alyp júrsiz be?" deıdi A.Tóleý.