Almas Melisuly Art Asia týrısik kompanıasymen kelisimshartqa otyryp, shetelde otbasymen demalýdy josparlaǵan. Alaıda Internette Art Asia týraly halyqtyń jaǵymsyz pikiri kóp bolǵandyqtan atalmysh kompanıanyń qyzmetinen bas tartqan. Ózara kelispeýshilik osydan bastaldy...

Art Asia týrısik kompanıasynyń ókilderi saýda ortalyqtarynda júrip kýpon taratady. Túrli utys oıyndary oınatylyp jatqanyn aıtyp, qaǵaz toltyrtady. Onda mindetti túrde aty-jónińiz, telefon nómirińiz kórsetiledi. Birneshe kúnnen keıin kompanıa qyzmetkerleri habarlasyp, shetelge joldama nemese turmystyq tehnıka utyp alǵanyńyzdy málimdep, sizdi quttyqtaıdy, Almatydaǵy Lýganskıı kóshesi 54 V meken-jaıynda ornalasqan keńsesine shaqyrady.

Almas Melisuly da dál solaı «Máskeý» saýda ortalyǵynda kýpon alǵan, qaǵaz toltyrǵan. Oǵan da turmystyq tehnıkaǵa ıe bolǵanyn habarlaǵan. Jubaıymen keńsege kelgende turmystyq tehnıka emes, Balıge joldama utyp alǵanyn aıtqan. Al eger 300 myń teńge tólese, qosymsha úsh qalaǵa saıahattaı alatynyn súıinshilep jetkizgen.

Almas Melisulynyń aıtýynsha, olardy keńsede úsh saǵat ustap, kofelerin usynyp, yńǵaıly jaǵdaı jasaǵan. Eń qyzyǵy, atalmysh kompanıa keńsesine jubaıymen barǵan Almas Melisulyna áıelimen aqyldasýǵa mursha bermegen. Úsh saǵat boıy túrli ádemi jerlerdiń sýretterin kórsetip, kóńilderin aýlaǵan.

– Bul – adamnyń oılanýyna mursha bermeı, ózderiniń paıdasyna tez sheshim qabyldatý úshin jasaǵan ádisteri, – deıdi Almas Melisuly.

Art Asia týrısik kompanıasy turmystyq tehnıka men shetelge joldama «utyp alǵan» barlyq adamdy dál osylaı qyzyqtyrady. Buǵan deıin de kompanıa qyzmetine shaǵym túsirip, aqshasyn qaıtarýdy talap etkender kóp bolǵan. Tipti, isti sotqa deıin jetkizgender bar. Biraq  kompanıanyń tutynýshymen jasaǵan kelisimshartynda zań boıynsha eshqandaı kinárat joq.

«Muratov company» zańgerlik kompanıasynyń dırektory Sergeı Stepasúktiń aıtýynsha, Almas Melisuly men Art Asia týrısik kompanıasy arasyndaǵy kelisimshartta shetelde demalý týraly eshteńe jazylmaǵan. Onda tek saıahattaıtyn elderde qonaq úıde turý jaǵy qarastyrylǵan, biraq onyń ózinde meken-jaıy naqtylanbaǵan.

- Tutynýshy zań boıynsha Art Asia týrısik kompanıasymen kelisimshartty buzýǵa quqyly. Dese de kompanıa ketken shyǵyndy eseptep, onyń tutynýshy tarapynan ótelýin talap ete alady. Tutynýshy belgili somany tólep, aqshasyn qaıtarýǵa quqyly. Sonymen qatar tutynýshy  aqshasyn qaıtarýdy surap, kompanıaǵa hat joldaı alady. Eger kompanıa tutynýshy shaǵymyna qatysty eshqandaı áreket etpese, quzyrly organdarǵa barýy qajet. Almas Melisulynyń jaǵdaıynda ol Astana qalasyndaǵy – tórelik sot. Alaıda qylmystyq is qozǵalýy ekitalaı. Sebebi kompanıa barlyǵyn zańdy bolatyndaı jasaǵan. Dese de kompanıanyń áreketinde qylmystyń quramy bar-joǵyn anyqtaıtyn arnaıy organdar bar, – deıdi Sergeı Stepasúk.

Zańgerdiń sózinshe, Almas Melisuly  kompanıaǵa poshtamen hat joldap, 15 kún kútýi qajet. Eger osy ýaqyt aralyǵynda jaýap kelmese, sotqa shaǵymdanýy kerek.

Zańgerlermen keńesken Almas Melisulyna sarapshylar kompanıanyń qyzmet kórsetýge ketken shyǵyndy eseptep, ózin qaryz qylyp qoıýy múmkin ekenin aıtqan.

– Biz kelisimshartty buzatynymyzdy aıtyp, aqshamyzdy qaıtarýyn talap etip aryz jazdyq. Sebebi men úshin otbasymnyń qaýipsizdigi mańyzdy. Shetelge ketip otbasymen dalada qalǵym kelmedi. Sondyqtan aryz jazdym. Art Asia týrısik kompanıasy aryzdy qabyldap, bes kúnniń ishinde jaýap beretinderin aıtty. Biraq jaýapty 11 kúnnen keıin biraq aldyq. Onda aqshany qaıtarý týraly eshteńe jazylmaǵan. Art Asia týrısik kompanıasy Luxurious-Tours LP kompanıasyna aqshany aýdaryp jibergendikten, bizge qaıtara almaıtynyn jazǵan. Sonymen qatar men tólegen 300 myń teńgeniń tek 10 paıyzy Art Asia kompanıasynda qalyp, ózge bóligi Luxurious-Tours LP kompanıasyna joldanǵanyn málimdedi. Atamysh sheteldik kompanıaǵa da aryz jazdyq. Art Asia qyzmetkerleri ol aryzdyń qaralatynyn ıa qaralmaıtynyn naqty aıta almady. Al Luxurious-Tours LP ókilderimen telefon arqyly sóılesýin suraǵanda bul ótinishimizden bas tartty. Almatydaǵy basshylary ornynda joq bolyp shyqty jáne qashan keletini týraly aqparat bermeı qoıdy, – deıdi Almas Melisuly.

Almas Melisuly 24 qańtarda «Qamshy» aqparat agenttiginiń tilshisi Jazıra Baıdalymen Art Asia týrısik kompanıasynyń keńsesine barǵan. Kompanıa qyzmetkerleri Almas Melisulynyń kelisimshartqa qol qoıǵanyn jáne onyń mazmunymen tanyspaǵanyna ózi kináli ekenin ashyq aıtqan. Utys oıyndary týraly bilgisi kelgen tilshimizge jýrnalıserdiń kompanıa klıenti bola almaıtynyn jáne utys oıyndary aıaqtalǵanyna sendirýge tyrysqan. Alaıda 25 qańtarda Art Asia týrısik kompanıasyna barǵanymyzda utys oıyndaryn «jeńip alǵan» adamdar keńsege lek-legimen kelip jatty. Barlyǵy dál Almas Melisulynyń oqıǵasyndaı. Saýda ortalyǵynda kýpon alǵan. Kompanıa qyzmetkerleri shetelge saıahat, turmystyq tehnıka utyp alǵanyn aıtqan. Solardyń biri – Áıgerim Sartaıqyzy.

– Kýpondy «Spýtnık» saýda ortalyǵynda aldym. Qandaı elde bolǵanymdy, qaı qalada demalǵanymdy táptishtep surap aldy. Bir kún ótkennen keıin habarlasyp túrli utys oınatylatynyn, syılyqtardyń jalpy baǵasy $200 ekenin aıtty, – deıdi Áıgerim.

Qazirgi zamanda tegin dúnıe árqashan kúmán týǵyzady. Sebebi tegin saıahatqa jiberip, turmystyq tehnıka syılaýdyń artynda adamdardan odan da kóp aqsha óndirip alý pıǵyly turady. Búgingi qoǵam, búgingi ómir salty adamdarǵa senbeýdi, óziń týraly aqparatty beıtanys adamnyń aldynda jaıyp salmaýdy, tegin dúnıege aldanbaýdy, tipti beıtanys adamnyń qolynan shaı ishpeý keregin árkez dáleldeı túsedi. Adam aqshany emes, aqsha adamdy bıleıtin zamanǵa tap boldyq. Keıbireýler jaǵdaıyn jasap, qaltasyn qampaıtý úshin túrli pasyq áreketke barady. Mundaılardyń quryǵyna túspeýdiń eń jaqsy amaly – saýattylyqty arttyrý jáne baıqampaz bolý. Áıtse de et pen súıekten jaralǵan adam bolǵandyqtan keıde kisilik qasıettiń baryna sengimiz keledi de turady.