25 qańtarda Astanada QR Kásipodaqtar federasıasy men Qazaqstandyq salalyq bilim jáne ǵylym qyzmetkerleri kásipodaǵynyń birlesip uıymdastyrýymen «Kásipodaqtar: jańarý men jańǵyrý jolynda» respýblıkalyq forýmy ótti. Forýmǵa elimizdiń barlyq aýdandarynan aýmaqtyq jáne salalyq kásipodaqtar ókilderi, QR Parlament depýtattary, QR Bilim jáne ǵylym mınıstrligi men joǵary oqý oryndarynyń ókilderi qatysty. Osy shara Elbasynyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýyn júzege asyrý aıasynda uıymdastyryldy.
Forýmdy ashqan QR Kásipodaqtar federasıasynyń Tóraǵasy Baqytjan Ábdiraıym Joldaýdyń negizgi erejeleri men tezısteri kásipodaqtardyń qyzmetimen tikeleı baılanysty ekendigin atap ótti. Kásipodaqtardyń qyzmetin túbegeıli reformalaý maqsatynda ortasha merzimdi kezeńge Federasıany jańǵyrýdyń «Jol kartasy» ázirlendi. Bul óz kezeginde Qazaqstandaǵy kásipodaqtar qozǵalysyna jańa lep berýi tıis.
Sondaı-aq, Forýmda sóz alǵan Qazaqstandyq salalyq bilim jáne ǵylym qyzmetkerleri kásipodaǵynyń Tóraıymy Maıra Amantaeva salalyq kásipodaq qozǵalysynyń mańyzdy baǵyttarynyń biri ustazdardyń quqyǵyn qorǵaý qajettigin túsiný, olardyń bilim alý deńgeıin arttyrý, ustazdar men ǵalymdardyń áleýmettik-ekonomıkalyq áleýetine járdemdesý bolyp tabylatyndyǵyn aıtty.
Forým barysynda kóterilgen máselelerdiń birqatary QR Kásipodaqtar federasıasy ázerlegen «Jol kartasynda» óz kórinisin tapty. Osy qujatta áleýmettik ádildik jáne áriptestik qaǵıdalaryn alǵa bastyrý, áleýmettik-eńbek qatynastaryn arttyrý, kásipodaqtardy kúsheıtý jáne nyǵaıtý úshin naqty maqsattar aıqyndalǵan. «Jol kartasy» elimizdegi quqyqtyq jappaı oqýdyń biryńǵaı júıesin qurýdy, Respýblıkalyq úshjaqty komısıa (RÚK) jumysyn jańǵyrtýdy, bekitilgen ujymdyq sharttardyń sapasy men mólsherin arttyrýdy qarastyrady. Búgingi tańda Qazaqstan boıynsha barlyǵy 34,4% (77 125) ujymdyq sharttar bekitilgen, sonymen birge búdjettik salada bul kórsetkish 90% teń.
Osy rette Qazaqstannyń kásipodaqtary jumys berýshilermen tyǵyz qarym-qatynas ornatý arqyly jumys oryndarynyń saqtalýyn qamtamasyz etýde: qazirgi kezde jumys oryndaryn saqtaý jóninde 115 134 memorandým bekitildi, bul barlyq Qazaqstan boıynsha 2,8 mıllıon eńbekkerdi qamtıdy.
Búginde kásipodaqtardyń birligin nyǵaıtý, jastardy keńinen tartý jáne jurtshylyqpen, BAQ-pen, saraptamalyq qaýymdastyqpen, áleýmettik jelilermen aqparattyq jumysty kúsheıtý qajettiligi týdy.
Forým aıasynda oblystyq bilim jáne ǵylym qyzmetkerleri kásipodaǵynyń tóraǵalary sóz sóıledi. Kezdesýge qatysýshylar Nursultan Nazarbaevtyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýynyń barlyq qyrlaryn qoldady.
