Qytaıda latyn qarpindegi mıkroblog alańy - «tyttey.com» dúnıege keldi. Qurylǵanyna úsh kún ǵana bolǵan mıkroblogqa qazirge deıin 300-den asa adam tirkelse, onyń 10 shaqtysy Qazaqstannyń azamattary bolyp shyqty. Germanıa, Fransıa jáne AQSH elderinen de «tyttey»-ge ún qosýshy qazaqtardyń sany kún sanap artýda.

Jaqyn kúnderi Qytaıdyń qazaq tildi saıttarynyń qyzý talqydaǵy taqyryby – latyn álipbıine kóshý máselesi ekenine kýá bolyp júrmiz. Elbasymyz Nursultan Ábishuly Nazarbaevtyń 2012 jylǵy Qazaqstan halqyna Joldaýynda «Qazaq alfavıtin 2025 jylǵa qaraı latyn grafıkasyna kóshirýge daıyndyq jumysyn osy bastan qolǵa alý qajet. Bul qazaq tilin jańǵyrtyp qana qoımaı, ony osy zamanǵy aqparattyń tiline aınaldyrady» degeni Qytaıdaǵy qandastarymyzdy bir qýantyp tastady. Buny ótken jyldyń eń jaǵymdy jańalyǵyna balaǵan qandastarymyz latynǵa kóshýge qulshynystaryn is arqyly dáleldeı bastady.

Ǵalamtor arqyly talaı qazaqtyń basyn qosyp júrgen Qytaıdaǵy eń alǵash qurylǵan qazaq saıttarynyń biri, tóte jáne kırıll qárpinde aqparat taratatyn birden-bir portal - www.senkazakh.com «Tıtteı» (www.tyttey.com) dep atalatyn mıkroblogtar alańyn ashty. Álemde bul tektes www.twitter.com júıesiniń mıllıondaǵan qoldanýshysy bar bolsa, Qytaıdyń www.weibo.com-yna 500 mıllıondaı adam tirkelgen.

«Mıkroblog júıesiniń aty «tıtteı» bolǵanymen kótergen júgi arýyr. www.tyttey.com qazaq tildi saıttar álemine úlken bir jańalyq, ǵalamtor qoldanýshylaryna jańa bir uǵym syılaıtynyna senimim zor»,-deıdi «Sen-Qazaq» saıtynyń jetekshisi Aqytbek Sherızatuly.

Shynymen de buny qazaq qoǵamyndaǵy tyń jańalyq dep aıtýǵa ábden qaqylymyz. Óıtkeni elimizde áli kúnge bundaı qazaqstandyq júıe ashyla qoıǵan joq. Bizdiń de qoldanatynymyz www.twitter.com.

«Kúlli qazaq balasynyń rýhanı birligi úshin latyn qarpine kóshýimiz kerek. «Tıtteı» atty júıeni ashýdaǵy maqsatymyz – barlyq qandastarymyzdyń uıaly telefon sıaqty zamanaýı tehnıkalyq quraldarda óz jazýymyzben tildesýin bastap, sol arqyly ana tilimizdiń órisin keńeıtý»,- deıdi atalmysh júıeni qurýshylardyń biri, Shyńjań gazetiniń aýdarmashysy Qulqaıtekti Nurlan Janaıqanuly.

Qazaq eli kırıll qarpin qoldanǵaly jarty ǵasyrdan astam ýaqyt bolsa da Qytaıdaǵy qandastarymyz áli kúnge Ahmet Baıtursynovtyń tóte jazýynda júr. Eki túrli álipbı qoldaný eki el qazaqtarynyń mádenı aýys-kúıisine keri áserin tıgizip kelgeni anyq. Onyń ústine ondaǵy qazaqtyń tili sol eldiń saıasatynyń saldarynan toz-tozy shyǵa bastady. Sondyqtan da Qytaı qazaqtary kúlli qazaqqa ortaq álipbıge kóshýdi zor úmitpen kútip otyrǵanyn aıta ketken jón. Osyǵan oraı «Ana tilge tıtteı úles qos!» degen urandy kótergen «Sen-Qazaq» saıtynyń azamattary Ábdýálı Qaıdarovtyń jasaǵan latyn jobasyn ózderine ıkemdep, www.tyttey.com-nyń jumysyn bastap otyr.

Endeshe, bar qazaqtyń balasy «Tıtteı»-ge tirkelip, tıtteı ún qosyńyz degimiz keledi!

Maıgúl SULTAN