«Sıfrlyq tehnıka jáne tehnologıa ınstıtýty» AQ dırektorlar keńesiniń sheshimimen Qazaqstan seısmologıa ınstıtýtynyń dırektory aýysty, dep jazady Qamshy.kz aqparat agenttigi.

Instıtýttyń burynǵy dırektory Ánýar Boranbaevpen eńbek kelisimi 12 aqpanda buzyldy. 24 aqpanda basshylyqqa Dosym Súleev keledi.

Búginde Súleev 70 jasta. 1970 jyly Q. I. Sátbaev atyndaǵy Qazaq ulttyq tehnıkalyq zertteý ýnıversıtetiniń avtomatıka jáne esepteý tehnıkasy fakúltetin bitirip, tehnıkalyq kıbernetıka kafedrasynda ınjener qyzmetine qaldyryldy. Máskeýdegi Bolat jáne qorytpalar ınstıtýtynyń aspırantýrasynyń kúndizgi bólimin támamdap jáne kandıdattyq dısertasıasyn sátti qorǵaǵannan keıin, Qazaq polıtehnıkalyq ınstıtýtyna pedagog retinde jiberildi.

1984 jyldan Almaty qalalyq partıa keńesiniń Bilim berý bóliminde jumys jasady.

1986 jyldyń sáýirinen Almaty energetıkalyq ınstıtýtynda oqý jumysy jónindegi prorektory qyzmetin atqardy.

 1997 jyldyń naýryzynda Qazaqstan Respýblıkasynyń Bilim berý jáne Mádenıet Mınıstrliginiń Joǵary jáne arnaıy bilim berý Departamentiniń dırektory qyzmetine taǵaıyndaldy.

2001 jyldyń qańtarynda QR premer-mınıstri kanselárıasynyń Qoǵamdyq mádenı damý bóliminiń bastyǵy qyzmetine aýystyryldy.

2001 jyldyń shilde aıynda Q.I. Sátbaev atyndaǵy Qazaq Ulttyq Tehnıkalyq Ýnıversıtettiń rektory bolyp taǵaıyndaldy.

2004 jyldyń qazan aıynan bastap Qazaqstan Respýblıkasynyń Ulttyq Ǵylym akademıasynyń Jer týraly ǵylym bóliminiń tóraǵasy bolyp keledi. Sonymen qosa, ol «Dos-Muqasan» ansambliniń negizin salýshy jáne alǵashqy basqarýshysy.