Almatyda "Altyn qalam" ádebı júldesi aıasynda kezdesý ótti. Shara barysynda avtorlarǵa alǵash ret ádebı "Oskar" syılyǵy tabys etildi, dep habarlaıdy Qamshy.kz aqparat agenttigi.
Atalǵan syılyq búgingi zaman ádebıetin damytýǵa eleýli úles qosqan qalamgerlerge berildi. Jeńimpazdar "Altyn qalam" baıqaýy men Áleýmettik ekonomıka jáne saıasat ınstıtýtynyń áleýmettanýshysy Aıman Júsipova birlesip júrgizgen áleýmettik zertteýdiń qorytyndysy boıynsha anyqtaldy. Zertteýge ádebıet, ǵylym, bıznes salasyndaǵy bedeldi 50-den astam sarapshy qatysyp, qazaqstandyq ádebıettiń damý barysy men búgingi kitap naryǵynyń jaǵdaıyna baılanysty jeke pikirlerin bildirdi. Sarapshylar sondaq-aı, qazirgi tańda suranysqa ıe ádebı janrlary, úzdik avtorlar men úzdik kitaptardy atap ótti.
Kezdesý barysynda Jyldyń úzdik baspasy, Jyldyń ádebı debúti, Kitap like (oqyrmandar tańdaýy), Áleýmettik mánge ıe taqyrypqa arnalǵan úzdik kitap, Jyldyń úzdik mesenaty (Ádebıetke kórsetken qoldaýy úshin) atalymdary boıynsha músinsheler men dıplomdar tabystaldy.
"Jyldyń eń úzdik baspasy" atalymy boıynsha "Ólke" baspasynyń dırektory Mereke Qulkenov marapattaldy.
"Úzdik baspa ataný úshin eń aldymen qazaq qalamgeriniń qandaı deńgeıde ekenin anyqtap alý kerek. Ne bolsa sony basyp shyǵara berýge bolmaıdy. Ekinshiden, qazaq tildi jazýshylarǵa qamqorlyq kerek",-dep jaýap berdi Mereke Qulkenov Aıdos Sarymnyń saýalyna.
"Jyldyń ádebı debúti" atalymy boıynsha Oleg Chervınskıı marapattalsa, oqyrmandar tańdaýymen "Kitap like" atalymy boıynsha Zıra Naýryzbaevanyń "Chetyre oblaka" kitaby úzdik dep tanyldy.
"Áleýmettik mánge ıe taqyrypqa arnalǵan úzdik kitap" atalymy boıynsha «Qazaqstan» RTRK» AQ Basqarma tóraǵasy Erlan Karınniń "Mejdý IGIL ı Al-Kaıdoı" kitaby úzdik dep tanyldy.
Al ádebıetke kórsetken qoldaýy úshin "Jyldyń úzdik mesenaty" nomınasıasy ZHERSU ınvestısıalyq-óndiristik korporasıasynyń tóraǵasy Baýyrjan Ospanovqa buıyrdy.
Marapatqa ıe bolǵan bes tulǵamen Uıymdastyrý komıtetiniń músheleri Aıdos Sarym, Dosym Satpaev, Nurjan Jalaýqyzy, Rasýl Jumaly jáne Qýat Dombaı shaǵyn suhbat júrgizdi.
Al jeńimpazdarǵa tabystalǵan músinsheler "Eldanı" qaıyrymdylyq qorynyń "Sándik-qoldanbaly óner sheberhanasynda" daıyndaldy. Atalǵan ustahanada birinshi jáne ekinshi toptaǵy múgedek 15 sheber jumys isteıdi.
"Altyn qalam" qulashyn keń jaıyp keledi. Baıqaýǵa qatysýshylar qatary da , joldanǵan jumystar sany da jyl ótken saıyn artyp keledi,-deıdi uıymdastyrýshylar.
Óz sózinde Aıdos Sarym "Oqyrmandar arasynda da baıqaý uıymdastyrý kerek",-dep aıtyp ótti.
Ádebı keshtiń qodaýshylary: “ZHERSU” ınvestısıalyq-óndiristik korporasıasy, QAZKOM, "Rýsskoe radıo Azıa", «Qazaqstan baspasóz klýby», "KTK", "31 arna", "Meloman" saýda jelisi, Qamshy.kz aqparat agenttigi, "Aıqyn", "Jas alash" basylymdary, "Arýna" baspa úıi.
