Erik Maǵzumuly Asanbaev — qazaqtyń kórnekti memleket qaıratkeri, dıplomat, ekonomıka  ǵylymdarynyń  doktory, profesor. Erik Maǵzumuly — búgingi qazaq tarıhynda tuǵyry bıik tulǵa. Onyń ómirlik joly, saıası murasy  ár adamǵa úlgi bolarlyqtaı. Eńbek jolyn sonaý 60-shy jyldary Qazaq KSR qarjy mınıstrliginde qarapaıym  qyzmetten bastaǵan ol óziniń bilimi men eńbekqorlyǵynyń arqasynda úlken, jaýapty qyzmetterge qol jetkizdi.

Aıta ketsek, Qazaq KSR qarjy mınıstriniń Orynbasary, Qazaq KSR mınıstrler keńesiniń tóraǵasynyń orynbasary, Qazaqstan Kompartıasynyń Ortalyq komıtet hatshysy jáne OK-de birqatar bólimderinde qarjy, saýda, ǵylym jáne bilim mekemeleri, ekonomıka bólimi meńgerýshisi qyzmetterin  atqardy. Keńestik kezeńde jınaqtalǵan osyndaı qyzmet pen tájırbıe jınaǵy eńseli elimiz egemendik alǵanda Erik Maǵzumulyn jas memlekettiń has saıasatkerine aınaldyrdy.

1991 jyly jalpy halyqtyq saılaýda Nursultan Ábishuly Nazarbaev Qazaqstan Respýblıkasynyń tuńǵysh prezıdenti bolyp, al Erik Maǵzumuly Asanbaev tuńǵysh jáne sońǵy  vıse-prezıdent bolyp saılanady.  Asanbaev bul qyzmetti 1996 jylǵa deıin atqaryp keldi. Vıse-prezıdent laýazymynda Erik Maǵzumuly elimizdiń qalyptasý kezeńinde aıanbaı qyzmet etti.

Onyń osy qyzmette Qazaqstannyń egemen el bolyp qalyptasýy men damý strategısy atty baǵdarlamada basshylyq etýi jas memlekettiń eldigin nyǵaıtýdaǵy birden bir qadam edi. Erik Maǵzumuly óz sózinde bul baǵdarlama jaıly «Svıdetelı» jýrnalynyń tilshisine bergen suhbatynda «Biz egemendik aldyq, ózindik damý jolyn tańdadyq, alaıda, ótkennen sabaq alyp, bolashaqty aıqyndaý úshin biz óz qundylyqtarymyzdy saralap, alǵa qoıǵan maqsattarymyzǵa jetý úshin durys baǵyt-baǵdar anyqtaý qajet boldy.

Perzıdenttiń sheshimimen kúrdeli problemalardy anyqtaý prosesteri  kezeńinde oryn alǵan zertteýler men usynystar úlken, aýqymdy da mańyzdy qujatqa aınaldy. Bul programmaly qujat tek ishki suranysty qamtamasyz etip qoımaı, álem aldynda elimizdiń pozıtıvti ımıjin qalyptastyrdy. Osy turǵydan men bul qujatta anyqtalǵan baǵyt baǵdarlarǵa búgingi ýaqyt ótkelinen oń baǵamdy berer edim» dep jaýap bergen eken. Sonymen qatar, Erik Maǵzumuly 1990-shy jyldardardyń basyndaǵy kadrlyq tapshylyq kezeńinde de memlekettik qyzmetkerler qataryn jas jáne ozat oıly azamattarmen tolyqtyra bildi.

Elimizdiń qazirgi bir qatar qaıratkerleri kezinde Asanbaetyń qolastynda istep, onyń mektebinen ótken.  Solardyń biri belgili memleket qaıratkeri, dıplomat, ıntellektýal Tólegen Tilekuly Júkeev Erik Maǵzumuly jaıly, onyń bilimdiligin sóz etkende «Asanbaev — erekshe tulǵa. Eger ol Amerıkada ómir súrgende Kolýmbıa nemese Chıkago ýnıversıtetteriniń profesory bolar edi. Tipti, Nobel syılyǵynyń ıegeri bolatyn edi» deıdi. Búgin 22 aqpan kúni Qazaqstan Respýblıkasynyń vıse-prezıdent laýazymy qyzmetiniń joıylýyna 22 jyl toldy. Bul qyzmetti atqarǵan Erik Maǵzumuly Asanbaev tarıhqa tuńǵysh jáne sońǵy vıse-prezıdent bolyp endi. Qyzmet te erekshe, qyzmetti atqarǵan adam da erekshe.

Abylaı SÁRSENBAEV

Jas Alash gazeti