Chernogorıa astanasy Podgorısada belgisiz adam AQSH elshiliginiń ǵımaratyna qaraı granata laqtyryp, ózin jaryp jiberdi. Chernogorıa BAQ-ynyń habarlaýynsha, oqıǵa 22 aqpan kúni tańǵa jýyq ýaqytta boldy. Portalanalitika.me saıtynyń aqparaty boıynsha, jergilikti turǵyndar tún jarymyna qaraı jarylys únin estigen, dep Qamshy.kz aqparat agenttigi Azatyqqa súıenip jazady.
Polısıanyń aty-jónin atamaǵan qyzmetkeri Reuters agenttigine tótenshe oqıǵa bolǵanyn ǵana aıtyp, basqa aqparat bermedi. Agenttiktiń Podgorısadaǵy foto tilshisi polısıanyń elshilik ornalasqan kósheni qorshaǵanyn, elshilik aıtarlyqtaı zaqymdanǵany baıqalmaıtynyn habarlady.
Polısıa jankeshti delingen adamnyń ózin ne úshin jaryp jibergeni ázirge belgisiz ekenin aıtady. AQSH-tyń Podgorısadaǵy elshiligi qaýipsizdik sharasynyń kúsheıtilgenin habarlap, amerıkalyqtarǵa Podgorısadaǵy halyq kóp júretin jerlerge barmaýǵa jáne jaǵdaıdy BAQ-tan baqylap otyrýǵa keńes berdi.
Buryn Iýgoslavıa quramynda bolǵan shaǵyn ǵana Chernogorıa memleketi byltyr mamyrda NATO-ǵa qosylǵan. Chernogorıadaǵy jáne Balqan túbegindegi reseıshil adamdar eldiń NATO-ǵa qosylýyna qarsy shyqqan.
