Elbasy, «Nur Otan» partıasynyń Tóraǵasy Nursultan Nazarbaevtyń sheshimimen Tamara Dúısenova partıa hatshysy qyzmetine taǵaıyndaldy, dep jazady Qamshy.kz aqparat agenttigi partıa saıtyndaǵy aqparatqa súıenip.
Búgin «Nur Otan» partıasy Tóraǵasynyń Birinshi orynbasary Máýlen Áshimbaev Ortalyq apparat ujymyna partıanyń jańa hatshysyn tanystyrdy. Máýlen Áshimbaev Tamara Dúısenovanyń memlekettik qyzmette jáne basshylyq laýazymda tájirıbesi baı ekenin erekshe atap ótti. Sondaı-aq ol Elbasynyń partıa qyzmetin jańǵyrtý jónindegi tapsyrmasyn júzege asyrýǵa jańa hatshynyń úlken úles qosatynyna senim bildirdi.
– Sizdiń áleýmettik saladaǵy baı tájirıbeńiz partıa jumysyna ıgi áserin tıgizedi dep esepteımin. Sebebi, áleýmettik máselelerdi sheshý «Nur Otan» partıasynyń basym baǵyttarynyń biri bolyp sanalady. Sizdiń partıa qataryna kelýińizben osy baǵyttaǵy jumysymyzdy odan ári kúsheıtemiz dep senemin, – dedi Máýlen Áshimbaev.
Tamara Qasymqyzy Dúısenova 1965 jyly 11 qańtarda Ońtústik Qazaqstan oblysynda týǵan. Tashkent halyq sharýashylyǵy ınstıtýtyn bitirgen. Ekonomıka ǵylymdarynyń kandıdaty. Ár jyldary ol jaýapty basshylyq qyzmetterdi abyroımen atqardy. Atap aıtqanda, Shymkent qalasy ákiminiń birinshi orynbasary, Ońtústik Qazaqstan oblysy ákiminiń orynbasary, Eńbek jáne áleýmettik qorǵaý mınıstrliginiń jaýapty hatshysy, vıse-mınıstri, Densaýlyq saqtaý jáne halyqty áleýmettik qorǵaý mınıstri, Eńbek jáne halyqty áleýmettik qorǵaý mınıstri bolyp jumys istedi.
Pikir qaldyrý