Búgin Astanada Qazaqstan musylmandary dinı basqarmasynyń uıymdastyrýymen Eýrazıa musylmandary ǵulamalarynyń forýmy ótti.

Halyqaralyq forýmnyń maqsaty - Ortalyq Azıanyń tarıhı dinı mektebin dáripteý arqyly dinı saýattylyqty arttyrý, Eýrazıa elderiniń ortaq pátýalar bazasyn qalyptastyrý, dinı ekstremızmniń kez-kelgen kórinisine qarsy ımýnıtetti qalyptastyrý, sondaı-aq  2018 jyly Qazaqstanda ótetin Álemdik jáne dástúrli dinder lıderleriniń kezekti sezine usynymdar ázirleý bolyp tabylady.

Forýmǵa qatysýshylar aldynda QR Din isteri jáne azamattyq qoǵam mınıstri Nurlan Ermekbaev quttyqtaý sóz sóıledi.

«Islam dini tatýlyq pen taǵattylyqtyń, jasampazdyq pen jarasymdylyqtyń dini ekenin árdaıym óz isimen kórsetip keledi.  Bizge osy murany saqtap qalý óte mańyzdy. Halyqqa dinniń dástúrli qaǵıdalaryn durys túsindirý úshin Quran men hadısterge negizdelgen bilikti ǵulamalar men ımamdardy jumyldyryp, bizge jetken baı muralarymyzdy qaıta jańǵyrtý úshin jumys jasaýymyz kerek dep sanaımyn. Dinnen, eń aldymen, rýhanı, moraldyq, etıkalyq qundylyqtardy alýymyz kerek»-dep atap ótti Nurlan Ermekbaev.

Forým jumysyna QR Parlamenti Senatynyń Tóraǵasy Qasym-Jomart Toqaev, Senat pen Májilis depýtattary, Qazaqstan musylmandary dinı basqarmasynyń tóraǵasy, Bas múftı - Serikbaı qajy Oraz, Eýropa men Ortalyq Azıanyń 21 elinen 35 delegat, atap aıtqanda bas mýftıler, dinı qaıratkerler, ıslam uıymdary men odaqtarynyń kóshbasshylary, zıaly qaýym ókilderi, jazýshylar, teolog-ǵalymdar, oblystardyń bas ımamdary  qatysýda.

Forým qorytyndysy boıynsha «Búgingi musylman kelbeti» qujaty qabyldanyp, forým qatysýshylarynyń Qarary jarıalanady.