Ýaǵyzy qyzý talqyǵa túsken Abdýǵappar Smanov halyqtan keshirim surady, dep habarlaıdy Qamshy.kz aqparat agenttigi. Imamnyń halyqtan keshirim suraǵan vıdeosyn Alı stýdıasy óziniń Youtube arnasyna jarıalady. 

«Meni bireý ózbek, bireý uıǵyr taǵy basqa ataýlar men atap, aýzyna kelgenin aıtyp júr. Men ózimdi tanystyryp ótetin bolsam, men Abdýǵappar Smanov Shákiruly 1970 jyly 22 aqpanda týǵanmyn. Men qazaqpyn, qazaqtyń ishindegi Seıit qojasymyn. Biraq biz eshqashan mynaý qazaq, mynaý qoja dep aıtqan emespiz. Meniń kóp ýaǵyzdarymnyń arasyna ózbek sózderiniń aralysyp ketýiniń sebebi men Qyrǵyzstanda ózbekterdiń qolynda oqyǵanmyn. Sonymen birge bizge ózbektiń shekarasy óte jaqyn. Biraq munda turǵan esh aıyp joq. Adamdar oryssha sóılep jatyr, oǵan eshkim qarsylyq kórsetip jatqan joq.  Kim qansha til bilse de óziniń tilin, dinin umytpasyn, sonyń ózi jetkilikti», — dedi Abdýǵappar Smanov.

Sonymen birge nesıe týraly ýaǵyzy daý týdyrǵan ımam búkil halyqtan keshirim surady.

«Men búkil halyqtan keshirim suraımyn. Óte qatty aıtyp qoıǵan máseleler bolǵan. Samaýyrdy sý aldy dese, Samarqandy sý aldy degendeı qylyp, bútin elge jarıalap jibergender boldy. Men álbette halyqtan, ózimizdiń musylman halqynan keshirim suraýdan uıalmaımyn da, qysylmaımyn da, qoryqpaımyn. Adam keıbir kezde ózin esten shyǵaryp qoıýy múmkin. Bul aqıqat nárse. Mundaı ashý-yzalar budan keıin bolmaıdy dep sóz bere alamyn. Bizdiń aıtyp jatqan ýaǵyzdarymyz keıbir adamdarǵa tıip ketip jatsa álbette keshirim suraımyz. Biraq negizinde sharıǵat, Quran aıattary aıtylǵan kezde, onyń aqıqaty aıtylǵan kezde aqıqatty aıtqan adam halyqtan keshirim suramaıdy. Sebebi ol óziniń mıyndaǵy nárseni aıtyp jatqan joq, júregindegini aıtyp jatqan joq. Bálkim ol kúıingennen, ashynǵanynan Allanyń Quranyn, Paıǵambar (S.Ǵ.S.) hadısin jetkizdi. Sebebi erteń qıamet bar, aǵaıyn. Qıamette árbir adam óziniń qara basymen álek bolady. Sol úshin biz aqıqatty aıtymyz. Aqıqatty aıtyp kele jatyrmyz. Biraq bul keıbir adamdarǵa jaqpaıdy eken. Meniń eshkimnen ala almaı júrgen óshim joq. Halyq sharıǵatty túsinip, adal men aramdy ajyratyp alatyn bolsa, ata-anasyn qurmettep, óziniń otbasymen tatý-tátti bolsa budan asqan qýanysh, baqyt joq. Bizdiń keıbir sózderimiz, ásirese meniń keıbir sózderim qatty tıip ketip jatqan bolsa bútin halyqtyń aldynda keshirim suraımyn», — deıdi Abdýǵappar Smanov.