QR Premer-mınıstri Baqytjan Saǵyntaevtyń tóraǵalyǵymen ótken Úkimet otyrysynda prezıdenttiń 5 áleýmettik bastamasyn iske asyrý jónindegi Jol kartasynyń jobasy qaralyp, qabyldandy. Qujatpen ulttyq ekonomıka mınıstri Tımýr Súleımenov tanystyrdy.

Jol kartasy múddeli memlekettik organdarmen jáne Ulttyq bankpen birlesip ázirlengen. Qujat 35 sharadan turady jáne jeti zań jobasyn, aty Úkimet qaýlysynyń jobasyn jáne úsh Ulttyq bank Basqarmasy qaýlysynyń jobasyn ázirleýdi, sondaı-aq mınıstrlerdiń eki buıryǵy men ákimdikterdiń tórt qaýlysyn qabyldaýdy qarastyrady.

QR Ulttyq banki — «Árbir otbasyna baspana alýdyń jańa múmkindikterin berý» birinshi baǵytynyń basty oryndaýshysy. Ulttyq bank ótken jyldardyń eń sátti tájirıbesin paıdalanyp, Memleket basshysy anyqtaǵan: jyldyq 7%, 25 jylǵa, bastapqy jarnasy 20% jaǵdaıynda «7 – 20 – 25» baǵdarlamasyn iske qosýdy kózdep otyr.

Baǵdarlamany iske asyrýǵa daıyndyq kezeńderi anyqtaldy. Jaqyn arada Ulttyq bank basqarmasy Baǵdarlama operatory — tolyqtaı enshiles arnaıy kompanıa qurý máselesin qarastyrady. Ulttyq Bank Úkimetke naýryzda qajetti zańnamalyq túzetýlerdi engizedi.

Baǵdarlamaǵa resmı tabysy bar Qazaqstan azamaty qatysa alady. Qazirgi ýaqytta bankter krıterıılerdi ázirlep jatyr. Máselen, eger turǵyn úı quny 7 mln teńge bolsa, onda aı saıynǵy tólem 50 myń teńgeden aspaıdy, bul qazaqstandyq qyzmetkerlerdiń kópshiligi úshin qolaıly. İri qalalar men aýdandardaǵy turǵyn úı qunynyń saralanýy joqqa shyǵarylmaıdy, sebebi turǵyn úı quny ártúrli bolady.

QR ulttyq ekonomıka mınıstrliginiń málimetine sáıkes, jańa ıpotekalyq baǵdarlama boıynsha alǵashqy turǵyn úı nesıesin shamamen osy jyldyń tamyz aıynda berý josparlanyp otyr.

«Jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtý» ekinshi baǵytynyń basty oryndaýshysy — Ulttyq ekonomıka mınıstrligi. Osy baǵytta salyq zańnamasynyń normalaryn ózgertý boıynsha usynystar ázirleý josparlanǵan.

Bilim jáne ǵylym mınıstrligi «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» úshinshi baǵytynyń negizgi oryndaýshysy. Atalǵan baǵyt aıasynda tehnıkalyq mamandyqtarǵa ekpin bere otyryp, memlekettik bilim berý tapsyrystaryn ulǵaıtý kózdelgen. Memlekettik-jekeshelik áriptestik qaǵıdasyndaǵy jataqhanalar qurylysy boıynsha tetikterdi anyqtaý men zańnamalyq túzetýlerdi ázirleý josparlanýda.

«Shaǵyn nesıe berýdi kóbeıtý» atty tórtinshi baǵytqa Eńbek jáne halyqty áleýmettik qorǵaý mınıstrligi jaýapty. Atalǵan baǵyt jelisi boıynsha 2017–2021 jyldarǵa arnalǵan Ónimdi jumyspen qamtý jáne jappaı kásipkerlikti damytý baǵdarlamasyna túzetýler engizý josparda bar. Ózgerister qalalardaǵy jáne aýyldyq jerlerdegi shaǵyn nesıe berýdi qarjylandyrýdy ulǵaıtýǵa jáne kásipkerlikti damytýǵa járdemdesýge baǵyttalatyn bolady.

«Eldi gazben qamtamasyz etýdi jalǵastyrý» besinshi baǵytynyń basty oryndaýshysy — Energetıka mınıstrligi. Atalǵan baǵyt «Saryarqa» magıstraldi gaz qubyrynyń birinshi kezeńiniń qurylysyna arnalyp otyr. Jobanyń sqemasy men qarjylandyrýdyń sharty belgilenetin bolady. EQDB, EADB jáne basqa da halyqaralyq qarjy uıymdary arqyly qarjy tartý josparlanýda. Jobany bıyl shilde aıynda bastaý josparlanǵan. Gaz qubyrynyń qurylysyn 2019 jylǵy jeltoqsanda aıaqtaý kózdelgen.

Sonymen qatar Ulttyq bank Tóraǵasy D. Aqyshev, ınvestısıalar jáne damý mınıstri J. Qasymbek, bilim jáne ǵylym mınıstri E. Saǵadıev, eńbek jáne halyqty áleýmettik qorǵaý mınıstri M. Ábilqasymova, energetıka mınıstri Q. Bozymbaev Prezıdenttiń Bes bastamasyn iske asyrý boıynsha Jol kartasynyń josparlanǵan is-sharalary týraly baıandady.

QR Premer-Mınıstri Baqytjan Saǵyntaev talqylaý qorytyndysy boıynsha, naýryz aıynyń sońyna deıin QR Parlamentine usyný úshin barlyq qajetti zańnamalyq ózgeristerdi ázirleýdi tapsyrdy.

Eske sala keteıik, 5 naýryzda Memleket basshysy Bes áleýmettik bastamany jarıalady. 6 naýryzda ótken QR Úkimetiniń otyrysynda Baqytjan Saǵyntaev Ulttyq ekonomıka mınıstrligine memlekettik organdarmen jáne Ulttyq bankpen birlesip, Elbasynyń bastamalaryn iske asyrý boıynsha egjeı-tegjeıli Jol kartasyn ázirleýdi tapsyrdy.