Almatyda ótken baspasóz máslıhatynda «Altyn qalam» ádebı júldesiniń jańa maýsymy jarıalandy, dep jazady Qamshy.kz aqparat agenttigi. Baıqaý osymen jetinshi ret uıymdastyrlyp otyr. 

Baıqaýǵa qazaq jáne orys tilinde jazylǵan jumystar 13 naýryzdan bastap 15 qyrkúıekke deıin qabyldanady. Ádebı týyndylardy adebiet2014@gmail.com, kenze2002@mail.ru elektrondy poshtasyna joldaýǵa bolady. Konkýrs jaıly tolyq málimet  www.akalam.kz  saıtynda jarıalanady. Saıysqa túsken barlyq shyǵarma atalmysh saıtta jarıalanady.

Oqyrmandar tómendegi atalymdar boıynsha daýys bere alady: 

1. Jyldyń úzdik poezıasy;
2. Jyldyń úzdik prozasy;
3. DARABOZ. Jyldyń úzdik balalar jáne jasóspirimder shyǵarmasy;
4. Esenjol Dombaev atyndaǵy jyldyń úzdik satırasy;
5. Jyldyń úzdik fantasıka jáne detektıv shyǵarmasy;
6. Jyldyń úzdik kınosenarııi jáne dramatýrgıasy;
7. Qazaq ádebıetine qosqan eleýli eńbegi úshin;
8. Qazaq tilindegi úzdik romanǵa Esenqul Mamanuly atyndaǵy syılyq beriledi.

Alǵashqy kezeńde shyǵarmalar www.akalam.kz veb-saıtynda irikteledi. www.akalam.kz saıtyndaǵy onlaın daýys berý 6 aıǵa sozylady. Daýys berý aıaqtalǵan soń ár atalym boıynsha 5 shyǵarma tańdap alynady. Saıystyń ekinshi kezeńine oqyrmandar tarapynan eń kóp upaı jınaǵan shyǵarmalar ótedi.

Jeńimpazdardy uıymdastyrýshylar men joba seriktesterinen quralǵan qazylar ár nomınasıa boıynsha  anyqtaıdy. Saıys barysynda shyǵarma avtorlary kórsetilmeıdi.

Aıta ketsek,  Esenqul Mamanuly atyndaǵy bas júlde  1 000 000 (bir mln) teńge qazaq tilinde jazylǵan úzdik romannyń avtoryna buıyrady. Sonymen qatar balalar ádebıetine arnalǵan «Daraboz» baıqaýynyń jeńimpazyna  1 000 000 (bir mln) teńge beriledi. Qarjylaı syılyqtardy  «ZHERSU» ınvestısıalyq-óndiristik korporasıasynyń jetekshisi Baýyrjan Ospanov taǵaıyndap otyr.  

«Altyn qalam 2018» ádebı júldesi jeńimpazdarynyń esimderi kúzde ótetin  marapattaý sharasynda jarıalanady. 

Qazaq ádebıetiniń búginine beı-jaı qaramaıtyn, qoǵamdyq qyzmettiń ár salasynda eńbek etip júrgen Dosym Sátpaev, Qýat Dombaı, Kenje Jumanuly, Rasýl Jumaly, Aıdos Sarym syndy azamattar 2009 jyly «Altyn qalam» ádebı baıqaýyn ótkizý týraly bastama kótergen bolatyn. Bıyl baıqaý jetinshi ret uıymdastyrylyp otyr.

Aıta keteıik, qazylar quramynda kásibı qalamgerler men ádebıetshiler joq. Kópshiliktiń talqysyna usynylǵan ádebı shyǵarmalardyń avtory da kórsetilmeıdi. Bul talaptar baıqaýdyń ádil ótýine kepildik beredi. 

Ádebı keshtiń qoldaýshylary: «ZHERSU» ınvestısıalyq-óndiristik korporasıasy, QAZKOM, «Meloman» saýda jelisi, Qamshy.kz aqparat agenttigi, «Qazaqstan baspasóz klýby»,   «KTK» telearnasy, «31 telearna», «Rýsskoe radıo Azıa», Massaget.kz jastar portaly, «Aıqyn», «Jas alash» basylymdary, «Arýna» baspa úıi.