Áleýmettik jelide «jeti baldyq jer silkini bolady» degen habarlamalar jıi tarap ketti, dep habarlaıdy Qamshy.kz aqparat agenttigi.

Belgisiz áıel «jınalysta búgin-erteń jeti baldyq jer silkinis bolatyny aıtyldy» dep halyqty sendirýge tyrysqan. Óz habarlamasy senimdi bolýy úshin atalmysh aqpardy seısmologıada jumys isteıtin qyzmetkerdiń aǵasy aıtqanyn jetkizedi.

Alaıda seısmologıa ınstıtýty mundaı boljamdy joqqa shyǵardy.

 «Bizdiń ınstıtýtta ǵana emes, tipti álem boıynsha jer silkinisi bolatyny ne bolmaıtyny jaıynda boljam jasalmaǵan. Jeti baldyq jer silkinisin kútýge bola ma joq pa? Aldaǵy apta osy másele týrasynda qorytyndy shyǵaramyz. Nege 7 bal? Sebebi mundaı qarqyn qurylystyń buzylýyna ákelip soǵady. Ári ol ómirge qaýip tóndiredi. Alty baldyq jer silkinisi ǵımaratqa zaqym tıgizbeýi múmkin. Sondyqtan biz tek joǵary boljamdardy aıtyp úırengenbiz», - dedi QR BǴM Seısmologıa ınstıtýtynyń óńirlik seısmıkalyq zerthanasynyń meńgerýshisi Alla Sadyqova zakon.kz tilshisine aıtqan málimdemesinde.

Byltyr Almaty qalasy Seısmologıa ınstıtýtynyń dırektory bolǵan Ánýar Boranbaı Qamshy.kz aqparat agenttiginiń tilshisine bergen suhbatynda seısmologtar jer silkinisi bolady dep naqty aqpar bermeıtinin aıtqan. Olar tek múmkin jaǵdaılardy jetkizedi.

Buǵan qosa Ábdirahman Kúrskeev te ǵylymnyń ózi qandaı da bir boljam aıtýǵa ruqsat etpeıtinin eskertken.

Aıta keteıik, 26 naýryzda Almatyda 3-4 baldyq jer silkinisi boldy. Jer asty dúmpýleriniń oshaǵy Almatydan 68 shaqyrym soltústik-shyǵysta ornalasqan.