Polısıa qyzmetkerleri tekseris barysynda áleýmettik jaǵdaıy nashar otbasynda tárbıelenip jatqan balalardyń múshkil haline kýá boldy. 3 jastaǵy balalar ash jáne kıimi las bolǵan, dep jazady Qamshy.kz aqparat agenttigi Almaty qalalyq İİD baspasóz qyzmetine silteme jasap.
Polısıanyń bergen aqparatyna sáıkes, otbasy Almaly aýdanynda turady. Inspektorlar úıge kelgende balalardyń ákesi uıyqtap jatqan. 1978 jylǵy er adam úıge bóten adamdar kelse de, oıanbaǵan. Almaty qalalyq İİD málimetine sáıkes, ol mas bolǵan. Balalardyń anasy úıde bolmaǵan.
«Úı apatty jaǵdaıda tur. Sanıtarlyq talapqa saı kelmeıdi. Barlyq jerde bótelkeler men túrli qoqystar jatyr. Balalardyń anasy keshke úıine keldi. 1977 jylǵy áıeldiń aıtýynsha, ol jumysta bolǵan. Ata-ananyń balalaryna nemquraıly qaraýy tańǵaldyrady. Eki balanyń jasy úshte. Balabaqshaǵa barmaıdy. Olardyń qandaı jaǵdaıda turyp jatqany eskerile otyryp, balalarǵa qatysty qajetti sharalar qoldanyldy. D. jáne A. esimdi balalardyń ómiri men densaýlyǵyna qaýip tóngendikten, olar kámeletke tolmaǵan balalarǵa arnalǵan beıimdeý ortalyǵyna ornalastyryldy», - deıdi polısıa polkovnıgi Leıla Álipbaeva.
Onyń sózinshe, otbasy esepke alyndy.
«Otbasy baqylaýǵa alyndy. Balalardyń ata-anasy aqylǵa kelip, jaǵdaıdy ózgertýge ýáde berdi. Áıtpese olar ata-ana quqyǵynan aıyrylýy múmkin. Sebebi balalar ómiri men densaýlyǵyna qaýip tónetindeı jaǵdaıda turyp jatyr», - dedi Leıla Álipbaeva.
