16 mamyrda barsha musylman jamaǵaty úshin qasıetti Ramazan aıy bastalady. Osy oraıda «Áziret Sultan» meshitiniń naıb ımamy Qanat Qydyrmınnen Ramazan aıyna qalaı daıyndalý kerektigin aıtty, dep habarlaıdy Sputnik Qazaqstan .
— Qazir biz Ramazannyń aldyndaǵy Shaǵban aıyna kirip jatyrmyz. Islam ǵalymdary Ramazanǵa daıyndyqta birneshe máseleni qarastyrady. Eń birinshi, ol musylmannyń nıetin jańartyp alý. Iaǵnı bir iske kirispeı turyp, aldymen nıet etý bul qaıyrly is bolyp sanalady. Paıǵambarymyz (s.ǵ.s.) aıtady: "árbir nárse nıetpen ǵana durys bolady jáne adam nıet etken nársesine qol jetkizedi". Sondyqtan da qasıetti Ramazan aıynyń aldynda eń áýeli nıetti durystap alý kerek. Ramazannyń negizgi maqsaty týraly Alla Taǵala Quranda bylaı deıdi: "eı, ıman keltirgender, aqıqatynda senderge oraza paryz boldy. Bálkim, sender Alladan qorqatyn bolarsyńdar" deıdi. Ramazannan shyǵýdaǵy negizgi maqsat adam Alladan qorqyp, ımandylyqpen shyǵýy kerek. Ol tek sýsynnan, tamaqtan tyıylý emes. Paıǵambarymyz (s.ǵ.s.) aıtady: "kimde-kim jaman sóz sóıleýin jáne jaman isin toqtatpasa, Alla Taǵalaǵa onyń tamaqtan, sýsynnan tyıylǵany qajet emes". Endeshe Ramazannyń ishki syry – tek tamaqtan, sýsynnan emes, jaman sóz ben isten, jaman oıdan tyıylý. Adam izgilikti nıet etip, jaqsy jaǵyna ózgerýge tyrysý kerek. Iaǵnı, eń birinshi Ramazanǵa daıyndyq nıet arqyly bolady, — dedi ımam.
Ramazan aıyna daıyndyq retinde jasalatyn ekinshi nárse – duǵa tileý.
— Paıǵambarymyz (s.ǵ.s.) "Alla Taǵala Erejep aıyn, Shaǵban aıyn berekeli etshi jáne bizdi Ramazanǵa jetkizshi" dep duǵa qylatyn bolǵan eken. Sondyqtan árbir musylman "Alla Taǵala, Ramazanǵa jetkize gór" dep duǵa etýi kerek. Úshinshisi, egerde adam bireýge qaryz nemese amanaty bolatyn bolma, Ramazan aıyna deıin qutylyp, qasıetti aıǵa taza, táýbemen kirgeni jaqsy. Ramazan – Alla men quldyń arasyndaǵy baılanys, al bireýdiń zaty adam men adamnyń arasyndaǵy haqysy. Sondyqtan adamnyń haqysy jelingen bolsa, Allanyń aldynda ol adamnyń orny bıiktemeıdi. Ol adam qansha jerden namazda jylap tursyn, qajylyq qylsyn, oraza ustasyn, biraq ol basqa bireýge qıanat jasap, alǵan zatyn qaıtarmaı júrgen bolsa nemese aldap ketken bolsa, Alla Taǵala onyń namazda jylap turǵanyn qajet etpeıdi. Óıtkeni bul jerde adamnyń haqysy jelinip tur. Sondyqtan Ramazanǵa deıin bireýden alǵan dúnıeni qaıtaryp, bergen ýádeni oryndap, táýbe jasap, taza kirgen jaqsy, — dedi Qydyrmın.
Imamnyń aıtýynsha, munyń ishine ótken Oraza aıynan qalǵan qaryzdy ustaý da kiredi. Ramazan aıyna ótken jyldyń qaryzymen kirýge bolmaıdy. Qaryz bolsa, osy Shaǵban aıynda ótep tastaǵan jaqsy eken.
— Tórtinshi másele, Ramazan aıynda musylman adamdy ǵıbadattan nemese qulshylyqtan mazalaıtyn jumystar bolatyn bolsa, solardy Ramazanǵa deıin sheship tastaý. Bul degenimiz ne? Keıbir kezde adamdar Oraza aıynyń aldynda bir isti bastap qoıyp, ony aıaqtap úlgermeı, Ramazan aıynda sol istiń mashaqatymen júrip, aýyzsharǵa ǵana kóńil bóledi. Sóıtip júrip Ramazan aıyndaǵy basqa ǵıbadattardan jurdaı bolyp qalýy múmkin. Nege? Ramazanǵa josparsyz kirgendikten. Sondyqtan kez kelgen musylman Ramazan aldyndaǵy daıyndyq retinde osy aıǵa úlken saparlardy nemese toı-dýmandardy josparlamaǵany abzal. Ondaı isterdi Ramazanǵa deıin nemese keıin jasaý ádemirekteý bolady. Besinshisi, ózi qýaný, ózgeni qýandyrý. Ózi qýaný – qasıetti aı kele jatyr dep, Alla Taǵalanyń qasıetti qylǵan nárselerine qýaný. Musylmandar Ramazan aıynyń kele jatqanyna qýanýǵa tyrysýy kerek. Al ózgeni qýandyrý degen ne? Mysaly otbasyly adam úıde áıelimen, bala-shaǵasymen otyryp, Ramazan kele jatyr, muqtaj adamdarǵa tamaq tarataıyq, sadaqa bereıik dep ıgi isterdi josparlap, merekege daıyndalǵandaı qýanyp, ózgelerdi qýandyrsa, bul nur ústine nur, — deıdi ımam.
— Sahabalar aıtady: "Paıǵambarymyz(s.ǵ.s.) óte jomart adam edi, biraq Ramazan kelgen kezde odan saıyn jomart bolyp ketetin edi" dep. Ramazan aıynda adam ózi ózgerýge tyrysýy kerek. Óıtkeni bul Alla men quldyń arasyndaǵy syr bolyp eseptelinedi. Biz namazǵa jyǵylǵandardy, qajylyqqa barǵandardy kóremiz, al oraza kórinbeıtin ǵıbadat. İshki dúnıesiniń Alla Taǵalaǵa tolyq berilýine septigin tıgizetin qasıetti ǵıbadat. Jáne de Ramazan aıynda saýapty amal jasaǵan bolsa, aı bitken soń da ony jalǵastyrýy kerek. Eger Ramazannan keıin de adamnyń minez-qulqy, izgi amaldary jalǵasyp jatatyn bolsa, bul onyń orazasynyń qabyl bolǵandyǵynyń áseri dep aıtady ǵulamalar, — dedi Qydyrmın.
