Almatydaǵy «Mercury Properties» JSHS-niń bas dırektory R.Qasy­mov Naýryz merekesine oraı «Jas­tar úıindegi» tárbıelenýshi jas­tarǵa jattyǵý zalyn qymbat quryl­ǵylarmen jabdyqtap berdi.

Áleýmettik mekemelerdiń túlekterin beıimdeý jáne qoldaý ortalyǵy 2006 jyldan beri «Jastar úıi» dep ataýyn ózgertken bolatyn. Mekemede taǵdyrdyń túrli taýqymetimen jetim, ata-ana qam­qorlyǵynsyz qalǵan balalar úıleriniń túlekteri tárbıelenýde. 16-17 jastaǵy balalar munda baspanamen, bilimmen qamtamasyz etilip, kásibı baǵdaryn anyqtaýǵa, ómirden óz ornyn tabýǵa jol salady.

Olar Naýryzdy bıyl da dúbirlete toılady. Yrystyń, bereke men birliktiń, jańǵyrýdyń merekesi sanalatyn Naýryz meıramyna Jambyl atyndaǵy Qazaq Memlekettik fılarmonıasynyń dırek­tory D.Ýásh, Qazaqstan Respýblı­kasynyń Halyq ártisi N.Núsipjanov, «Qoǵamdyq ke­lisim» memlekettik mekemesiniń dırek­tory J.Murynova, Áýezov aýdandyq Tilderdi damytý jáne mádenıet basqar­masynyń basshysy B.Qýanyshev jáne taǵy da basqa qonaqtar kelip, aq tilek, oń batalaryn berdi.

Dúbirli toı  «Mercury Properties» JSHS-niń bas dırektory R.Qasymovtyń demeýshiligimen jabdyqtalǵan jattyǵý zalynyń saltanatty ashylýymen bas­taldy. Naýryz-dýmanǵa kelgen qonaqtar mekeme jastarynyń san qyrly ónerlerin tamashalap, qazaqtyń salt-dástúrleriniń biri – tusaý kesý rásimine kýá boldy. Tútinin býdaqtatyp, qazan-oshaqtyń astyna ot jaqqan mekeme jastary dalada qurylǵan altybaqanǵa da ýaqyt taýyp jatty. Kelgen qonaqtar kıiz úıdiń dastarhanyndaǵy ulttyq taǵamnan aýyz tıip, naýryz kójeden dám tatty.

Atalǵan mekemeniń basshylyǵyna ótken jyly Lázzat Shaıkenovanyń kelýimen kóptegen ıgi is jańasha qarqyn alǵan. Jetim kórse, jebep júretin qanymyzdaǵy saltqa berik atymtaı jomarttar bul mekemege jıi bas suǵyp, tárbıelenýshi jastarǵa kompúter, teledıdar alyp berip, olardyń jumysqa ornalasýyna kómektese bastaǵan.

Jańa basshy ózimen birge jańa lep ala keldi degen mekeme qyzmetkerleri mundaǵy tárbıelenýshilerdiń «Bolashaqqa baǵdar: rýhanı jańǵyrý» baǵdarlamasynda aı­tylǵan «Jalpyulttyq qasıetti oryn­dardy» aralaǵanyn da aıtty.

– Balalar ortalyqta 29 jasqa deıin bolady. Bul jerden olar tolyq bilim alyp, belgili bir mamandyqqa beıimdelip, jumysqa ornalasady. Sońǵy 4 jylda Úkimet pátermen qamtamasyz etýde. Endi jetim balalar da belgili bir jeńildikpen úı ala alady. Balalar úıinde kámelettik jasqa tolmaı turyp, eger áke-sheshesiniń qaldyrǵan úıi bolmasa, Almaty qalasy Turǵyn úı basqarmasynda kezekke qoıylady. Ol kezekti áleýmettik pedagogtar aı saıyn baqylap otyrady.  Eger bir otbasynyń úsh balasy osy mekemege túsip, áke-sheshesinen úı qalmasa, memleket úsh balaǵa da jeke-jeke úı beredi, – dedi «Jastar úıiniń» dırektory Lázzat Shaıkenova.

Búginde «Jastar úıinde» barlyǵy 213 tárbıelenýshi men turǵyn bar. Oqý oryn­darynda oqıtyn 17–23 jas aralyǵyndaǵy túlekter «Jasóspirimder úıine», al jumys isteıtin 20–29 jasqa deıingi túlekter «Jastar úıine» qonystan­dyrylǵan. Onyń ishindegi 72-si stýdentter. Joǵary oqý oryndarynda – 26, kolejde – 46 tárbıelenýshi oqyp bilim alýda.

Mundaǵy tárbıelenýshi jastar ómirde ózderine ǵana senip ómir súredi. Keıde olardy Úkimettiń balalary dep te jatady. Óıtkeni, olardyń 29 jasqa deıingi qoldaýshylary – Úkimet. Iaǵnı memleket tarapynan jetim balalarǵa aı saıyn stıpendıa beriledi, jyldyń tórt mezgiline qajet kıim-keshekke aqsha bólinedi.

Degenmen, osyndaǵy tárbıelený­shilerge qarap, ómirdegi naǵyz baqyt – keıde ózimiz qadirine jete bermeıtin ata-anamyzdyń ystyq alaqany men jylý­lyǵynda, alys-jaqyn týǵan-týysqanymyz bar otbasylyq ómirde ekenin anyq túsinesiz.

– Mundaǵy balalar úlken otbasym, týysqanym kóp bolsa dep armandaıdy. Top bolyp ómir súrgenimen, olardyń árqaısysy qaıdan shyqqanyn bilip otyr ǵoı, sondyqtan ata-ájem bolsa eken deıdi. Óıtkeni, adam ómirde jalǵyzdyqtan jalyǵady, – deıdi «Jastar úıinde» on jeti jyldan beri qyzmet istep kele jatqan aǵa tárbıeshi Marjan Taýtenbaeva.

Bul balalar adamǵa betiń bar, júziń bar demeı, oıyndaǵysyn ashyq aıtady. Sizdi unata ma, unatpaı ma, ony da kózińizge týra qarap turyp tars etkizedi. «Uıat-aý» dep qymsynyp, jan-dúnıe­sindegini jasyryp qalý olarǵa tán emes. Eger sizdi jaqsy kórse, úlken armandaryn da sizben bólisýge daıyn.

«Jastar úıinen» túlep ushqan jastar­dyń jeke kásipterin ashyp, óz eńbek­terimen páter satyp alǵandary da bar. Úsh tildi jaqsy meńgergen jastar áýejaıda jumys isteıdi, Amerıkaǵa ketkenderi de bar. Tipti, mundaǵy Vova esimdi orys balasy ıslamdy qabyldaǵan.

Sońǵy kezderi ınternettiń jaqsy damýyna baılanysty ata-analaryn izdep taýyp jatqan balalar da kóp kórinedi. Sondaǵy maqsattary – olar ózderiniń qaıdan shyqqanyn, tegin bilý. Áke-sheshe­sin tapqandary qonaqqa baryp kelýden ary aspaı qalatyn kórinedi. «Synǵan shyny birikpeıtini» sekildi, olardyń da ata-analarymen aradaǵy qarym-qatynas birikse de, syzyq qalyp qalǵan…