Ankarada ataqty kúıshi, kompozıtor Dına Nurpeıisovanyń músindik kompozısıasy ashylady. Bul týraly ortalyq komýnıkasıalar qyzmetindegi brıfıń barysynda Atyraý oblysynyń ákimi Nurlan Noǵaev málim etti.

Jobaǵa Atyraý oblysynyń bıznes qurylymdarynyń ókilderi qoldaý bildirdi. Qazaq kompozıtorynyń eskertkishin ornatýǵa 15 mln teńge jumsalmaq.

Músindik kompozısıa Qazaqstan Respýblıkasy Táýelsizdiginiń 20 jyldyǵyn Túrkıada merekeleý aıasynda 2011 jyly Ankarada ashylǵan Dına Nurpeıisova atyndaǵy saıabaqta ornatylady. Sol jyly Túrkıada ataqty qazaq kompozıtory Dına Nurpeıisovanyń 150 jyldyq mereıtoıy keńinen atalyp ótti.

- Qazaqstannyń Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda rýhanı jáne mádenı qundylyqtardy saqtaýǵa jáne molaıtýǵa erekshe kóńil bólingenin atap ótkim keledi. Jahandaǵy zamanaýı qazaqstandyq mádenıet» jobasy aıasynda qazirgi tańda qazaq mádenıetiniń úzdik týyndylarymen álem jurtshylyǵyn tanystyrý úshin jaǵdaılar jasalýda. Bul otandyq shyǵarmashylyq zıaly qaýym úshin úlken múmkindikterge jol ashady, - dedi Nurlan Noǵaev. 

 Qazaqstan Elshiliginiń, Túrkıanyń mádenıet jáne týrızm mınıstrliginiń, Túrik mádenıeti halyqaralyq uıymynyń (TÚRKSOI) jáne Ankara qalasy Etımesgýt aýdany meriniń uıymdastyrýymen 2011 jyly Dına Nurpeıisova atyndaǵy saıabaq ashylǵanyn esterińizge salamyz. Bul – tanymal kúıshiniń atyndaǵy shetelde ashylǵan alǵashqy saıabaq. 

Ataqty qazaq kompozıtory Dına Nurpeıisova – tek qazaq halqynyń emes, búkil túrik jurtshylyǵynyń yqylasy men qurmetine bólengen túrik álemindegi alǵashqy áıel.