Almatyda álemniń 5 myńnan astam týrısik fırmasynyń qatysýymen kórme-forým ótti.
Almatyda álemniń 5 myńnan astam týrısik fırmalarynyń qatysýymen kórme-forým ótkizdi. Týrızmmen-aq halqyn asyrap, jylyna mıllıardtaǵan dollar tabatyn memleketter Qazaqstanǵa tájirıbelerimen bólisti.
Qum daladan aq safarı saıahatyn sapaly ótkizip, qyzyl teńizdiń qyzyǵy arqyly qap-qap qarjy taýyp otyrǵan eldiń biri - Egıpet. Tórtkúl dúnıeden aǵylǵan adamdar sanynyń artýy úshin tıimdi tásilder qoldanatyn mysyrlyqtar byltyr týrıser sanyn 8 mıllıonǵa jetkizipti.
«Mysyr emdik, demalý jáne tarıhı jerlerdi aralaý syndy san túrli baǵyttarda týrızmdi joǵary jolǵa qoıǵan. Biraq osyndaı kórme arqyly biz eldi tanystyrýdy áli de jalǵastyra bermekpiz. Almatyda ótip jatqan kórmege myńdaǵan kompanıalardyń ókilderi keldi. Olar osy arqyly-aq sizderdiń týrısik fırmalarmen baılanys ornatyp, elderińizdi nasıhattaı alady. Biz sizderdegi qyzmet sapasyn joǵarlatý joly boıynsha stýdentterdi ózimizge aparyp, tájirıbemen bólisýge daıynbyz», - dedi Mysyr Arab respýblıkasy elshiliginiń attashesi Nemdan Ibrahım.
Byltyr Antalıa, Alanıa, Stambýl syndy bes qalasy arqyly 32 mıllıon týrıs tartqan Túrkıa bıligi de Almatyda ótip jatqan kórmege qatysyp jatyr. Qyzmet pen qundy qatar alyp, álem halqyn qyzyqtyra bilgen túrikter Qazaqstannyń týrıs áleýeti artyq deıdi.
«Túrkıa kóptegen sala boıynsha Qazaqstanmen dostyq qatynasta. Qazaqstan geografıalyq múmkindikteri, kórikti jerleri, tabıǵaty arqyly týrızmi joǵary elderdiń qatarynan kórinýge múmkindigi bar. Byltyr Qazaqstannan 400 myń demalýshy Túrkıaǵa barsa, bıyl ony 600 myńǵa deıin jetkizýdi josparlap otyrmyz. Ótken jyly elimiz týrızm arqyly 30 mıllıard dollardan artyq kiris kirgizdi», - dedi Túrkıanyń Qazaqstandaǵy bas konsýly Ryza Kagan Iylmaz.
Kórmege kelýshilerdiń ishinde jergilikti týrısik fırmalarmen kelisim shartqa otyryp jatqan kompanıalar kóp. Tek, Almatynyń Shymbaulaq, Medeý, Kók tóbe syndy kórikti jerlerinen bólek eldiń ár óńirinde júzdegen oryndar bar. Tek, syrtqy jarnama men qyzmet sapasy aqsap tur.
«Bizdiń týrıser qaıda barǵysy keledi? Kórme zertteý men qyzmet túrlerin anyqtaýǵa múmkindik beredi. Sheteldik kompanıalarmen baılanys arqyly biz basqa memlekettiń adamdaryna óz qyzmetimizdi usynamyz. Bizdegi qonaq úı quny, qyzmet aqysy syrty týrıser aǵyny kóbeıgen kezde tómendep, sapa joǵarlaıdy», - dedi Qazaqstan týrızm qaýymdastyǵynyń Prezıdenti Roza Azanbaeva
«Týrızm jáne Saıahat» kórmesine 29 elden 5 myńnan astam fırma qatysyp jatyr. Qazaqstan týrızm qaýymdastyǵyna 700-den astam kompanıa múshe bolǵanmen, kóbi janbaǵys úshin jergilikti jurtty shetke jiberýge jumys jasaıdy. Sáıkesinshe syrttan keletin týrıserdiń ortasha kórsetkishi 2 mıllıon adamnan aspaıdy. Al jer kólemi shaǵyn bolsada jylyna 6 mıllıon saıahatshyny tartyp otyrǵan Grýzıa, adam aǵynyn arttyrý úshin ushaq qunynda quldyratýǵa baryp otyrmyz deıdi. 3 kúnge sozylatyn kórme-forým barysynda otandyq fırmalar ushaq, qonaq úı, syndy saıahat salasyna qatysty problemalardy talqylamaq.
