Almatynyń belsendi jastary Boraldaı saq qorǵanynyń mańaıyn tazalady.
Almatyda halyqaralyq tarıhı eskertkishterdi qorǵaý kúni atalyp ótti. Qalanyń belsendi jastary Boraldaı saq qorǵanyna baryp, ekskýrsıa jasap, arheologıalyq jerdiń mańaıyn tazalady. Merekelik sharaǵa arna tilshileri de qatysyp qaıtty.
Tarıhı eskertkishterdi qorǵaý kúninde qalanyń belsendi jastary Boraldaı saq qorǵanyna baryp, ekskýrsıa jasady. Ondaǵy tarıhı qundy zattarmen tanysty. Sonymen qatar, ertedegi adamdardyń qalaı jerlengenin tamashalady.
Saq, úısin kezeńinde máıitti jerleıtin jerdi izdeıtin arnaıy adamdar bolǵan. Olar zırattyń qos qaptalynan ózen ótetin oryndy tańdaǵan, deıdi arheologtar. Óıtkeni, sol kezdegi adamdardyń túsinigi boıynsha mazarlar ornalasqan jer qudaımen baılanys ornatatyn oryn bolyp sanalǵan. Qorǵanda adamdar ártúrli jerlengen. Iaǵnı, munda ár kezeńniń handary nemese laýazymdy adamdary jatqan bolýy múmkin. Boraldaı saq qorǵanyn qaz-qalpynda saqtap, aldaǵy ýaqytta mýzeı qylyp ashý josparda bar eken.
«Bul eskertkishterdiń eshqaısysyna qazba jumystary júrgizilmegen. Barlyǵy buzylyssyz kúıde. Ázirge memlekettiń qorǵaýynda tur. Jalpy, bolashaqta osy jerde Boraldaı saq qorǵandary mýzeıin ashý josparlanǵan. Qazirgi tańda jobasy ázirlenýde», - dedi Almaty murajaıynyń qyzmetkeri Tolǵanaı Mahambetálı.
2 myń 600 jyldan astam tarıhy bar arheologıalyq orynda 47 saq qorǵany men 200-den astam úısin qorǵandary ornalasqan. Olardyń bıiktigi 14 metrden asyp jyǵylady. Adamdar munda bizdiń zamanymyzǵa deıin İİİ, İİ ǵasyrlarda kelip qonystana bastaǵan. Atalǵan aımaqtan attyń tisi, eńbek quraldary tabylypty.
Arheologıalyq orynnyń aýmaǵy at shaptyrym jer. Uzyndyǵy 3 shaqyrym bolsa, al eni 800 metrge deıin jetedi. Boraldaı saq qorǵany osy kúni Qazaqstannyń sakraldy kartasyna engen oryn. Búgingi merekelik shara «Rýhanı jańǵyrý» baǵdarlamasy aıasynda uıymdastyrylyp otyr.
«Bul Elbasynyń salıqaly saıasaty – «Bolashaqqa baǵdar.Rýhanı jańǵyrý» baǵdarlamasyn iske asyrý barysynda keler urpaǵymyzdyń keleshegine degen at salysý boıynsha ıgi is-sharalardyń biri», - dedi Almaty qalasy Mádenıet jáne arhıvter basqarmasynyń mádenı mura bóliminiń basshysy Nazerke Kákejanova.
Jalpy, Almatyda respýblıkalyq jáne jergilikti mańyzy zor 136 tarıhı eskertkishter bar. Olardyń barlyǵy elimizdiń mádenı murasy úshin orny erekshe. Sondyqtan byltyr Qazaqstannyń sakraldy kartasy daıyndalyp, tarıhı oryndardyń atlasy jasalǵan bolatyn. Ondaǵy maqsat - elimizdiń tarıhı qundy jerlerin qorǵaý, olardy keler urpaqqa qaz-qalpynda jetkizý bolsa kerek.
