Almaty qalasynda kásipkerleriniń dástúrli konferensıasy ótti.
Kásipkerlik kókjıegin keńeıtý. Bıznestegi bógetter. İskerler arasynda týyndaǵan máseleler Almaty qalasy kásipkerleriniń dástúrli konferensıasynda sóz boldy. Jıynǵa qala ákimi Baıyrjan Baıbek pen «Atameken» Ulttyq kásipkerler palatasynyń tóraǵasy Tımýr Qulybaev qatysty. Basqosýda orta jáne shaǵyn bıznesti damytý jóninde atqaminerler men bıznes ókilderi óz pikirler men usynystaryn aıtty.
Almaty qalasy bıznes úshin tıimdi aımaq. Máselen, shaǵyn orta bıznes shyǵaratyn taýardyń 26 paıyzy osy Alyp shaharda óndirilse, qaladaǵy onyń úlesi 33,7 paıyzdy quraıdy. Al salyq túsimderiniń 50 paıyzy da solardyń esebinde. Sonyń arqasynda, aımaqtyq jalpy ishki ónim mólsheri 11,7 paıyzǵa artqan. Shaǵyn orta bızneste zańdy túrde qaladaǵy árbir 7-shi adam jumys isteıdi. Osy rette Almaty qalasynyń ákimi Baýyrjan Baıbek jergilikti kásipkerlerdi qoldap, bıznes ókilderine barynsha kómek berip jatqan «Atameken» Ulttyq palatasyna óz alǵysyn bildirdi.
«Shyn máninde, osy jyldyq kásipkerlerdiń konferensıasy ashyq problemalardy talqylaıtyn jaqsy alańǵa aınaldy. Árıne, jumys bolǵandyqtan kemshiliktersiz de bolmaıdy. Endi úlken qala. Almaty - kásipkerlerdiń altyn besigi dep jaqsy aıtyp kettińiz. Biz osy jaýapkershilikti sezemiz. Sondyqtan árbir kásipkerdiń, almatylyqtardyń, bizdiń salyq tóleýshilerdiń problemalaryn sheshýge tyrysamyz. Endi bizde qolymyzdan kelgenshe máselelerdi júıeli sheshýge talpynamyz. Ol da myna kásipkerlik palatasynyń qoldaýymen jolǵa qoıylǵan», - dedi Almaty qalasynyń ákimi Baýyrjan Baıbek.
Óz kezeginde, Tımýr Qulybaev «Atamekenniń» atqarǵan jumystaryna toqtaldy. 2013 pen 2017 jyldar aralyǵynda Ulttyq palataǵa bıznesti qorǵaýǵa qatysty 22 myńnan astam ótinim kelip túsipti. Olardyń 40 paıyzy oń sheshim taýyp, nátıjesinde 92 mlrd teńgeden astam somada kásipkerlerdiń múliktik quqyǵy qorǵalǵan. Ótinimderdiń basym bóligi sáýlet, qala qurylysy, salyq organdaryna qatysty. «Atameken» 20 myńnan astam normatıvti-quqytyq aktiler men zań jobalaryna saraptama júrgizipti. Memlekettik organdar usynystardyń 73 paıyzyn eskerip, ulttyq palata jańa salyq kodeksiniń daıyndalýyna belsene qatysqan.
«Almaty - kásipkerlerdiń basyn qosqan Alyp shahar. Ondaǵy bıznes klımattyń bizdiń elimizge de áseri bar. Sondyqtan bul salaǵa asa kóńil bólip, ákimshilik kedergilerdi joıý kerektigin qarastyrýdamyz. Jalpy memlekettik organdar men kásipkerler arasynda jaqsy qarym-qatynas ornady dep aıtýǵa bolady. Endi ony ary qaraı damytý kerek. Ózderińiz bilesizder, Bas prokýratýra janynan kásipkerlerdi qorǵaıtyn keńes ashyldy. Ol da bolsa, bıznes ókilderin barynsha qoldaýǵa baǵyttaldy», - dedi «Atameken» QR Ulttyq kásipkerler palatasynyń tóralqa tóraǵasy Tımýr Qulybaev.
Dástúrli jıyn sońynda kásipkerler oıda júrgen pikirleri men usynystaryn aıtty. Belgili bolǵandaı, qazir ımportty almastyrýǵa jatatyn 268 otandyq taýar túri anyqtaldy. Búginde 7,9 trln teńgege taýar ımporttalsa, onyń 1,6 trln teńge somasyndaǵy otandyq taýar ımportty almastyrýǵa qaýqarly. Elde jaryqtandyrý, syr-boıaý ónimderi men qurylysqa qajetti metal qurylymy bar.
