Bıyl Maqtaral aýdanynda 10 myń gektarǵa jerge júgeri daqyly egiletin bolady. Qaıta óńdegen jaǵdaıda 25 túrli ónim alýǵa bolatyn daqyldy ázirdiń ózinde birneshe sharýa qojalyǵy eksperıment retinde egip kórmek. Sondaı-aq, aýdanda aldaǵy 1-2 jylda qus fermalaryn kóbeıtý josparlanyp otyr.

Budan bólek, aýdanda maqta shıkizatyn tereń óńdeý isi jandana túspek. Naqtyraq aıtsaq, aq altynnan jip ıirý, toqyma ónimderin daıarlaıtyn irili-usaqty sehtar salý kózdelip otyr. Bul týraly «Hamro ata» sharýa qojalyǵynyń tynys-tirshiligimen tanysqan aýdan ákimi Jamantaı Beısenbaev málim etti.

Aýdan ákimi aldymen atalǵan qojalyqtyń maqta óńdeý zaýytyna at basyn burdy. Munda qazir maqta egý naýqanyna qajetti tuqymdyq shıt ázirleý jáne shıtpen sharýalardy qamtamasyz etý jumystary jalǵasýda. Munan bólek, atalǵan sharýa qojalyqtyń ıeleginde 7 gektar jylyjaı bar. Onda bıyl 5,5 gektar qyzanaq pen 1,5 gektar jerge kóktemgi daqyldardyń birneshe túri egilgen.

Qyzanaq jylyjaıyn aralap kórgen aýdan ákimi anar baǵynyń búgingi jaı-kúıin de surastyrdy. Sondaı-aq, aýdandyq tájik mádenı ortalyǵynyń tóraǵasyna Qostanaı oblysyna jer ıgerý naýqanyna erikti jumyssyz jastardy tartý máselesin júktedi. Naqtyraq aıtsaq, tanymal kásipker Baharadın Ablazımovtyń ıeligindegi 950 myń gektar bıdaı egistigin ıgerýge jumys kúshi qajet bolyp jatyr eken. Mesenat Qostanaı óńirine qajetti jumysshylardy Maqtaraldan kóptep tartýdy josparlap otyrǵan kórinedi. Eger, sonda jumys isteımin deýshiler tabylyp jatsa, baspana alyp berip, turaqty jumyspen qamtymaq.

Osy rette, aýdan ákimi jaz aılarynda erikti topty Qostanaı óńirine arnaıy jiberetindigin málim etti.