«Rýhanı jańǵyrý»: Almaty aýdandarynda júzdegen is-shara ótti.
Almaty qalasy Bostandyq aýdanynyń turǵyndary «Rýhanı jańǵyrý» baǵdarlamasyn júzege asyrýǵa belsendi at salysty. «100 jańa esim» jobasyna engen almatylyq 20 azamattyń 8-i dál osy aýdannyń turǵyndary. Elbasynyń baǵdarlamasyn jastar da erekshe qoldaǵan. Aýdandaǵy mektep, kolej jáne oqý oryndarynda 100-den asa is-shara ótken. «Týǵan jer» baǵdarlamasynyń aıasynda 300 oqýshy Altyn adam syndy tarıhı jádiger tabylǵan Esik qalasyna baryp qaıtqan.
«Taǵy da josparymyz bar, 300 bala jiberemiz. 50 balany osy jaqyn arada jiberdik. Osy kún jylynǵannan keıin bul jumysymyz ary qaraı jalǵasyn tabady. Sodan keıin ózderińiz bilesizder, qazir jastardyń kitap oqýǵa tartý jóninde sáýir aıynda josparlanǵan. Esentaı ózeniniń jaǵasynda ashyq kitaphana jasaıyq dep otyrmyz. Ulttyq kitaphana bizdiń Bostandyq aýdanynda ornalasqanyna baılanysty. Osy kitaphanalarymyzdyń barlyǵy oǵan qatysady», - dedi Almaty qalasy Bostandyq aýdany ákiminiń orynbasary Marjan Balabaeva.
Medeý aýdanynda «Rýhanı jańǵyrý» baǵdarlamasy aıasynda 300 shara uıymdastyrylǵan. Onyń eń aýqymdysy - túlekter forýmy. Oǵan elimizdiń ár óńirinen kelgen 500-den asa azamat qatysty. Aýdandaǵy mektep túlekteri bilim berý mekemelerin qalpyna keltirýge, sondaı-aq onyń qurylysyna 50 mıllıon teńge kóleminde qarjy quıǵan. «Týǵan jer» baǵdarlamasy aıasynda 5 oqý oshaǵynyń aýlasy jóndeýden ótkizilgen. 120 aýla abattandyrylyp, aǵashtar otyrǵyzylǵan. Oǵan qosa, kósheler kúni atalyp ótken.
«Mereıli Medeý» aksıasy aıasynda osy Medeý aýdanynda turyp jatqan 25 myń zeınetkerimizdiń qandaı jaǵdaıda turyp jatyr? Onyń turmys-tirshiligi qandaı? Tipti olardyń qandaı eńbegi sińirdi? Elge qandaı qyzmet atqardy? Osynyń ishinde ómiri elge, jastarǵa ónege bolatyn, ónegeli ómir ıesi bolatyn qarıalarymyzdyń, qazynaly qarıalarymyzdyń jastarmen kezdesýin uıymdastyrdyq. Sol arqyly 15 myń jasty qamtydyq», - dedi Almaty qalasy Medeý aýdany ákiminiń orynbasary Ǵanı Maılybaev.
