«Qazaqstan» teleradıokorporasıasy janynan qurylǵan kórkem telehıkaıalardy irikteý jónindegi Sarapshylar keńesi Keıki batyr týraly týyndy ıdeıasyn maquldady, dep habarlaıdy Qamshy.kz aqparat agenttigi «Qazaqstan» teleradıokorporasıasynyń basshysy Erlan Qarınge silteme jasap.
«Teleradıokorporasıa uıymdastyrǵan baıqaýǵa kelip túsken birneshe telehıkaıalardyń sınopsıstarynyń arasynan 1916 jylǵy Torǵaıda bolǵan ult-azattyq kóterilistiń batyry, ataqty mergen - Keıki Kókembaıuly týraly telehıkaıanyń ıdeıasy qoldaý tapqan bolatyn. Búgin osy «Keıki mergen» telehıkaıasy boıynsha Keıki batyrdyń ómir súrgen ortasy týraly zertteýler jasap júrgen Shóptibaı Baıdildın aǵamyz ben tarıhshy Berik Ábdiǵalımen kezdesip, osy telehıkaıaǵa baılanysty oı-usynystaryn tyńdadyq. Sondaı-aq, bolashaq telehıkaıanyń rejıseri Murat Bıdosov usynǵan senarıdiń alǵashqy nusqasyn talqyǵa saldyq», - dep jazdy Erlan Qarın áleýmettik jelidegi paraqshasyna.
Keıki (Nurmaǵanbet) Kókembaıuly (1871-1923) - 1916 jylǵy Torǵaıda bolǵan ult-azattyq kóterilisiniń batyry, ataqty mergen. Orta júz quramyndaǵy Qypshaq taıpasynyń Qulanqypshaq rýynan shyqqan. Qostanaı oblysy Amankeldi aýdanynyń Baıtýma qopasynda dúnıege kelgen. Jastaıynan ańshy, mergendigimen, ójettigimen aımaqqa tanylǵan. Onyń quralaıdy kózge atqan mergendigine saı el aýyzynda «Amangeldiniń kózi mergen, Keıkiniń qoly mergen» degen sıpattama saqtalǵan.
Keıki batyrdyń ádebıettegi beınesi Ǵabıt Músirepovtiń «Amangeldi» pesasynda Kete batyr bolyp beınelenedi. Maqan Jumaǵulovtyń «Qyran qazasy qıada» kitabynda jumbaqtalyp aıtylady. Keıkiniń qarasózde jasalǵan kórkem beınesi Aqan Nurmanovtyń «Qulannyń ajaly» atty romany edi.
Alaıda keńes zamanynda shyqqan onda da aty anyq aıtylmaǵan. Keıki beınesi óz atymen anyq aıtylyp, qanyq boıaý deregimen túgeldenip shyqqan shyǵarma Serik Turǵynbekulynyń «Keıki batyr» tarıhı dastany (Almaty, «Bilim», 2001). Keıki batyr Kókembaıulynyń urpaqtary Qostanaı oblysynyń Amangeldi aýdanyndaǵy Aqtas, Tasty eldi mekenderinde turady. 1996 jyly Keıki batyrdyń 125 jyl tolýyna baılanysty as berilip, eskertkish ornatyldy.
