Armenıada «Elk» parlamenttik opozısıalyq fraksıa lıderi Nıkol Pashınándy eldiń premer-mınıstri laýazymyna usyndy. Úkimet tizginin qolyna alý úshin Pashınánǵa keminde 53 depýtat daýys berý kerek.

Seısenbide ótken pres-konferensıada Pashınán halyq qalasa, úkimetti basqarýǵa daıyn ekenin jetkizgen.

«Respýblıkalyq partıa ókilderi premerlikke kele almaıdy. Olardyń dáýiri aıaqtaldy. Bıliktiń aýysýyn daý-damaısyz ótýin qadaǵalaý kerek», - degen edi Pashınán.

«Elk» partıasynyń parlamentte toǵyz depýtaty bar, al taǵy bir «Sarýkán» opozısıalyq partıasynan 31 depýtat bar.

Parlamentte negizinen Armenıanyń Respýblıkashyldar partıasy ókilderi kóp oryn ıelengen. Atalǵan partıa «Dashnaksýtún» partıasymen bir koalısıada birikken. Biraq 25 sáýirde basqarýshy koalısıa tarap ketti.

Armenıada saıası daǵdarys kezinde, eki aptadan beri ótip jatqan narazylyq aksıasy premer-mınıstr Serj Sargsánnyń otstavkaǵa ketýimen aıaqtalǵan. Ol Armenıany 10 jyl basqardy.

25 sáýirde Nıkol Pashınán jaqtastary narazylyq aksıasyn qaıta jańartty. Bul Pashınán men bılik partıasynyń kelissózi úzilip qalǵannan keıin bastaldy. Pashınán demonstranttardy Erevannyń Respýblıkalyq alańyna jınalyp, «barqyt halyqtyq revolúsıa jeńisin nyǵaıtýǵa» shaqyrdy.