Almaty qalasynda QR Parlamenti Májilisiniń depýtaty Bekbolat Tileýhan­nyń tóraǵalyq etýimen «Nur Otan» partıasy janyndaǵy «Mıras» respýblıka­lyq keńesiniń kóshpeli otyrysy bolyp ótti. Onda kún tártibine shyǵarylǵan «Jastar­dyń joǵary bilimge qoljetimdiligi men sapa­syn arttyrý» taqyryby talqyǵa salyndy.

Aldymen atalmysh keńes músheleri ál-Farabı atyndaǵy Qazaq ulttyq ýnıversıteti, Q.Sátbaev atyndaǵy Qazaq ulttyq tehnıkalyq zertteý ýnıversıteti, Abaı atyndaǵy Qazaq ulttyq pedagogıkalyq ýnıversıteti, Qazaq memlekettik Qyzdar pedagogıka ýnıversıtetiniń profesorlyq oqytýshylar quramy jáne stýdenttermen kezdesip, jataqhanalardyń jáne onda turyp jatqan stýdentterdiń jaǵdaıymen tanysty.

Jastarǵa degen memleket qamqorlyǵyn Elbasy óziniń 5 áleý­mettik bastamasynda «Joǵary bilim alýdyń qolje­timdiligi men sapasyn arttyryp, stýdent jastardyń jataq­hanadaǵy jaǵdaıyn jaqsartý» tıesili bolady dep kórsetti. Qazir jyl saıyn bólinetin 54 myń grantqa qosymsha 2018-2019 oqý jylynda taǵy 20 myń grant bólý qarastyryldy. Onyń 11 myńy tehnıkalyq mamandyqtar boıynsha baka­lavrlyq bilim berýge, ıaǵnı tórtinshi ónerkásiptik revolú­sıa jaǵdaıyndaǵy jańa ekonomıkada zor suranysqa ıe bolatyn san myń mamandy daıarlaýǵa bólinedi. Bul rette Elbasy 2022 jyldyń sońyna deıin stýdentterge arnap keminde 75 myń oryndy jańa jataqhana salýdy tapsyrdy. «Bul aldaǵy jyldarda óse túsetin suranysty eskergenniń ózinde jataqhana tapshylyǵyn birjola sheshýge tıis» degen bolatyn Memleket basshysy.

Atalmysh joǵary oqý oryndaryn aralaý kezinde belgili bolǵan jáıttardy atap ótsek, 2017-2018 oqý jylynda Qazaq memlekettik Qyzdar pedagogıkalyq ýnıversıtetinde 5871 stýdent bilim alýda. Atalmysh ýnıversıtette 7 jataq­hana bar, onda 3177 stýdent turady. Sol sıaqty, ál-Farabı atyndaǵy Qazaq ulttyq ýnıversıtetinde 17 143 stýdent bilim alsa, onyń ishinde grantta oqıtyndar sany – 13 775-ti qurap otyr. Ýnıversıtetke qarasty 15 jataqhanada 5730 stýdent turyp jatyr. Q.Sátbaev atyndaǵy Qazaq ulttyq tehnıkalyq ýnıversıtetinde 9949 stýdent bilim alsa, onyń ishinde grantta oqıtyndar sany – 8545. Oqý ornyna qarasty 6 jataqhanada 1998 stýdent turyp jatyr. Abaı atyndaǵy memlekettik pedagogıkalyq ýnıversıtette 6821 stýdent bilim alýda. Onyń 3270 stýdenti grantpen oqıdy. Ýnıversıtetke tıesili 5 jataqhanada 1887 stýdent turady.

Elimizdiń JOO-da bilim alyp jatqan 530 myń stýdenttiń 204 myńy qalaǵa syrttan kelgen stýdentter. Qalaǵa syrttan keletin stýdentterdiń jataqhanamen qamtylýyn kórsetetin resmı statısıkalyq málimetter taldaýy bul jaǵdaıdyń qanaǵattanarlyq deńgeıde emes ekenin kórsetti. Jataqhanalarǵa joǵary suranys Almaty qalasynda – 21 557 adam, Astana qalasynda – 14 239 adam jáne Qaraǵandy oblysynda – 8253 adamdy qurady. Jalpy alǵanda, respýblıka boıynsha stýdenttik jataqhanalarǵa suranys 77 500 kereýettik oryn bolyp otyr.

Respýblıkalyq «Mıras» keńesiniń ekinshi bólimi «Nur Otan» partıasynyń Almaty qalalyq fılıalynda jalǵasyn tapty. Keńeste Almaty qalasynyń ákimi, «Nur Otan» partıasy qalalyq fılıalynyń tóraǵasy Baýyrjan Baıbek kún tártibindegi jataqhanalardyń salynýy boıyn­sha aldaǵy qoıyp otyrǵan josparlarymen tanystyrdy.

Sonymen birge, «Mıras» keńesiniń múshesi QR Parla­menti Senatynyń depýtaty Dınar Nóketaeva jáne QR Parlamenti Májilisiniń depýtaty Saýytbek Ábdirahmanov sóz sóıledi.

Otyrystyń qorytyndysy boıynsha, «Mıras» keńesiniń músheleri kún tártibindegi máselelerdi talqylaı kele, QR Bilim jáne ǵylym mınıstrligine Elbasynyń 5 áleýmettik bastamasyna sáıkes, granttardy úlestirýdiń ekonomıka­lyq turǵyda áleýmettik ádildik máselesin eskere otyryp, JOO-da qabyldaý erejeleri jaıly, halyqty alańdatqan suraqtarǵa buqaralyq aqparat quraldarynda, áleýmettik jelilerde aqparat berýdi kúsheıtýdi tapsyrdy. Taǵy bir týyndaıtyn suraq – mamandyqtar boıynsha granttardy úlestirý. Talapker óz múmkindigin baǵamdaı almaıdy,  profıldik pán tańdaýǵa jáne daıyndalýǵa úlgermeı jatady. «Altyn belgi» alyp, grantqa ilinbeı qalǵan jaǵdaı­lar kezdesti. Bıyl osy júıege zańdy túrde ózger­týler engizip, ótken jylǵy bolǵan olqylyqtardyń aldyn alý kerektigi alǵa tartyldy. Sonymen qatar, Astanadaǵy JOO-larda oryn jetispeıdi. Barlyǵy elordaǵa barǵysy keledi. Osy máseleni qalaı sheshýge bolady? Keńes músheleri bilim salasynda kezdesetin osyndaı ózekti máselelerdiń sheshý joldaryn qarastyrdy.

Sondaı-aq, jataqhanalarda stýdenttermen kezdesý barysynda Qazaq memlekettik Qyzdar pedagogıkalyq ýnıversıtetine qarasty bólmelerde aýa jetispeıdi, órt qaýipsizdigi men tehnıkalyq qaýipsizdik múldem joq dep aıtsa bolady. Bul máseleler boıynsha usynystar tıisti organdarǵa jiberilip, oryndalýy baqylaýǵa alyndy.

Jıyn qorytyndysynda «Mıras» keńesi memle­ket basshysy N.Á.Nazarbaevtyń «Prezıdenttiń bes áleý­mettik bastamasy» Úndeýine qoldaý bildirdi. «Bes áleýmettik bastama» aıasyndaǵy árbir baǵyt mańyzdy ári qoǵamnyń belgili bir toptarynyń suranysyna saı ekendigin jetkizdi.

Qalaı desek te, Úndeýdegi «Joǵary bilim alýdyń qolje­timdiligi men sapasyn arttyrý, stýdent jastardyń jataq­hanadaǵy jaǵdaıyn jaqsartý» baǵyty jas býyn úshin úlken múmkindikter alańy bolmaq.