QR Prezıdenti Nursultan Ábishulynyń Qazaqstan halqyna arnalǵan «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýynda kóterilgen basty máselelerdiń biri – elimizdiń turǵyndaryn qoljetimdi baspanamen qamtamasyz etý bolatyn. Osy oraıda Batys Qazaqstan oblysynyń ortalyǵynan jer kólemi 425 gektardy quraıtyn «Aqjaıyq» jańa shaǵynaýdanynyń qurylysy bastalmaq. Atalǵan aýdanda 150 kópqabatty úı, 9600 oqýshyǵa arnalǵan 8 jalpy bilim beretin mektep,9 balabaqsha, densaýlyq saqtaý nysandary men 78 balalar oıyn alańyn salý josparlanýda. Qazirgi tańda shaǵynaýdan boıynsha ınjenerlik jeliler men qamtý jumystary bastaldy. Bul týraly oblys ákimi Altaı Kólginovtiń tóraǵalyǵymen ótken keńes otyrysynda Oral qalasynyń ákimi Murat Muqaev baıandady.
Keńeske oblystyń basqarma basshylary jáne mekeme-kásiporyn jetekshileri qatysty.Oblys ortalyǵynyń damý jospary talqylanǵan jıynda qala ákimi Murat Muqaev Elbasynyń bes áleýmettik bastamasynyń oryndalýy, «Smart sıtı» jobasyn júzege asyrý, áleýmettik nysandar qurylysy men shahardy abattandyrý týraly baıandama jasady.– Elbasymyzdyń «Nurly jol», «Nurly jer» sekildi birqatar aýqymdy baǵdarlamalary jáne oblys basshylyǵynyń qoldaý kórsetýi nátıjesinde qala búdjeti jyl sanap artyp keledi. Búgingi tańda qala búdjeti ótken jyldyń osy kezeńimen salystyrǵanda 52 paıyzǵa artyp, 40,6 mıllıard teńgeni qurap otyr. Aǵymdaǵy jyldyń birinshi toqsanyndaǵy qalanyń áleýetin arttyrý baǵytyna qaralǵan qarajat 14,4 mıllıard teńgeni qurady. Ótken jyly bul kórsetkish 7,9 mıllıard teńge bolatyn. Qala búdjetiniń basym bóligi bilim berý salasyna, turǵyn úı-kommýnaldyq júıeni jetildirý men qurylys salasyna jumsalýda,– dedi Murat Rahmetuly.
Qala ákiminiń usynǵan málimetterine súıensek, aǵymdaǵy jylǵa arnalǵan qurylys jumystarynyń jalpy kólemi 13 mlrd. Teńgeni quraıdy. Onyń 80 paıyzy, ıaǵnı 10 mlrd. teńge turǵyn úı qurylysy úshin kózdelse, 1 820,0 mln. teńge nemese 14 paıyzy ınjenerlik ınfraqurylymdy damytýǵa baǵyttalǵan. Ótken jyly bastalǵan bes kópqabatty turǵyn úıdiń qurylysy aǵymdaǵy jyly jalǵasyn tappaq. Bıylǵy jyly «Nurly jer» turǵyn úı qurylysy baǵdarlamasy boıynsha eki turǵyn úıdiń qurylysy bastalǵan.
– Elimizdegi ıgi baǵdarlamalardy júzege asyrý maqsatynda turǵyn úı qurylysy boıynsha 14 turǵyn úıdiń jobalyq-smetalyq qujattamasy jasaqtaldy. Sonyń ishinde toǵyz turǵyn úı Zashaǵan kentinde, alty turǵyn úı Oral qalasynyń soltústik-shyǵys bóliginde boı kóteretin bolady. Aǵymdaǵy jyly kólemi 159,1 myń sharshy metrdi quraıtyn 3242 páterli
21 úıdiń qurylysyn júrgizý josparlanǵan bolatyn. Budan bólek, bıylǵy jyly apatty dep tanylǵan 14 úıdi buzyp, ornyna jańa kópqabatty turǵyn úı salý kózdelýde. Atap aıtqanda, qaladaǵy Ǵ. Qurmanǵalıev, Ǵ. Qarash, N. Nekrasov kóshelerinen bir úıden, Qurmanǵazy, Iý. Gagarın kóshelerinen, Eýrazıa dańǵylynan úsh úıden, A. Skorobogatov kóshesinen eki úı súrilip, ornyna 1500 páterli kópqabatty úıler salynyp, apatty jáne tozyǵy jetken úılerde turǵan 432 adam jańa turǵyn úımen qamtylatyn bolady. Barlyq baǵdarlama boıynsha bıylǵy jyly qalamyzda 4742 páterge arnalǵan 35 kópqabatty úıdiń qurylysy júrgizildi. Bul – shaharymyzda buryn-sońdy bolmaǵan kórsetkish, – dedi qala ákimi.
Keńes otyrysyna tóraǵalyq etken oblys ákimi josparlanǵan jumystardyń ýaqtyly jáne sapaly oryndalýyn qatań qadaǵalaýdy tapsyrdy.
– Qala ortalyǵy men shaǵynaýdandardaǵy joldardy jóndeý jumystaryn tez arada bastaý kerek. Kóktemniń shýaqty kúnderin tıimdi paıdalaný úshin ótken jyldyń sońynda qarajatyn qarastyryp, merdigerlerdi anyqtadyq. Endi ýaqyt joǵaltpaı, jumysqa kirisken jón. Injenerlik júıelerdi jóndeýdi de uzatpaǵan durys. Jataqhana salý jumystaryna memlekettik-jeke menshik áriptestik aıasynda kásipkerlerdi kóptep tartý kerek. Qoǵamdyq kólikke keler bolsaq, avtopark basshylarymen sóılesip, avtobýstardy jańartýdy qatań júkteý kerek. Biz olarǵa kólik jańǵyrtýǵa ýaqyt berdik. Nátıjesin suraıtyn kez keldi. Jol jóndeý jumystaryn júrgizgende birinshi kezekte qoǵamdyq kólik júretin negizgi joldar qamtylýy tıis. Sonymen qatar basym baǵytty bıylǵy kóktemde qıyndyq týdyrǵan kóshelerge salýymyz qajet. Oblys pen qalanyń búdjeti bekitildi, atqarylatyn jumystar men merdigerler anyqtaldy. Endi ýaqyt joǵaltpaı iske kirisýimiz kerek, – dedi keńes otyrysyn qorytyndylaǵan oblys ákimi Altaı Kólginov.
