«Dostyq» sport kesheninde basketboldan Qazaqstan chempıonatynyń aıasynda fınaldyq kezdesýler ótti. El birinshiliginde eki úmitker «Almatylyq Legıon» men «Qazyǵurt» komandalary qyzyqty da tartysty oıyn úlgisin kórsetti. Basketbolshylar baryn salyp, baq synasty. Oıynshylardyń jeńiske degen yntalary alǵashqy sátterden-aq baıqaldy. Degenmen, birinshi kezeńdi almatylyqtar 36:17 esebimen sátti aıaqtady. Alaıda, machtyń ekinshi jartysynda shymkenttikter alań qojaıyndaryn qýyp jetip, esepti teńestire aldy, 36:36.
Oıynnyń sońyna qaraı eki komanda arasyndaǵy shıelenis arta tústi. Basketbolshylar birdeı deńgeıde bástesti. Úshinshi kezeńdi almatylyqtar qarsylastaryn úsh upaı aıyrmasymen jeńdi, esep 58:55. Sońǵy sheshýshi kezeńde basymdyq bir komandadan ekinshisine ótip otyrǵanymen, sońynda «Almatylyq Legıon» sportshylary jınalyp, qarsylastaryn tize búktirdi. Mach almatylyqtardyń jeńisimen, 82:74 esebimen óz máresine jetti.
– Oıyn qıyn berildi, sońǵy mınýtqa deıin basymdyq qaı komandada ekeni belgisiz edi. Bul kópten kútken jeńis, almatylyqtardy quttyqtaımyn, bizge qoldaý kórsetken basketbol jankúıerlerine alǵys bildiremin. Oıynnyń ekinshi jartysynda kishkene qatelikter jiberildi, onyń ústine qarsylastar da myqty boldy. Eki komanda da baryn salyp oınady, sondyqtan da upaı aıyrmasy kóp emes, – deıdi «Almatylyq Legıon» komandasynyń kapıtany Vsevolod Fadeıkın.
Sonymen qatar, «Sınegore» men astanalyq «Tıgr» komandalary da kezdesip, úshinshi oryn úshin talasty. Mach nátıjesi boıynsha 78:68 upaımen «Sınegore» basketbolshylary jeńiske jetti. Al «Bars» pen «Atyraý barystary-2» besinshi oryndy sarapqa saldy. Bul machta «Barsy Atyraý barystary-2» qarsylastaryn 101:74 esebimen oısyrata utty.
El chempıonatynda komandalar týrnır kestesinde osylaısha jaıǵasty. Jeńimpazdar men júldegerlerdi Almaty qalasy Dene shynyqtyrý jáne sport basqarmasynyń jáne basketbol federasıasynyń ókilderi marapattady. Jeńimpaz komandalarǵa kýbok, medaldar tabystaldy.
