Áleýmettik múmkindigińizden aıyrylyp qalmańyz.
Almaty qalasy Aımaqtyq komýnıkasıalar qyzmetinde 2017–2021 jyldarǵa arnalǵan Nátıjeli jumyspen qamtý jáne kásipkerlikti damytý baǵdarlamasy men jańa formattaǵy áleýmettik kómekti júzege asyrý máseleleri boıynsha ótken baspasóz brıfıńinde Almaty qalalyq Jumyspen qamtý jáne áleýmettik baǵdarlamalar basqarmasynyń basshysy Meıirjan Otynshıev osylaı deıdi. Jýrnalısermen bolǵan bul suhbattasýǵa basqarma basshysymen birge Almaty qalalyq Jumyspen qamtý ortalyǵynyń dırektory Meıram Súıindikov qatysty.
Jumyssyzdyq pen áleýmettik másele qazirgi kezdegi ózekti máselelerdiń biri bolǵandyqtan bolar, jýrnalıserdiń osy eki salaǵa jaýapty basshylarǵa qoıatyn saýaldary az bolǵan joq. Halyqty jumyspen qamtý, áleýmettik jaǵynan az qamtylǵan turǵyndarǵa áleýmettik qoldaý kórsetý, muqtaj azamattarǵa arnaýly kómekter kórsetý, múmkindigi shekteýli tulǵalarǵa áleýmettik kómek kórsetý, Nátıjeli jumyspen qamtý jáne jappaı kásipkerlikti damytý máseleleri boıynsha jýrnalıser tarapynan qoıylǵan saýaldarǵa jaýap bergen basshylardyń bergen málimetine súıensek, qalamyzdaǵy jumyssyzdyq pen áleýmettik máselelerdi ońtaıly sheshý baǵytynda atqarylyp jatqan jumystar jaman emes kórindi. Jalpy, Almaty qalasy boıynsha qazirgi kezde jumyssyz adamdar sany 8600 adamdy quraıdy eken. Ótken 2017 jyly halyqty jumyspen qamtý sharalarymen 34 708 adam qamtylypty. Tegin kásiptik bilim alýǵa 2500 9–11 synyp oqýshylary tartylsa, qysqa merzimdi oqýlarǵa 3004 adam jiberilgen. 15 374 adam turaqty jumyspen qamtylsa, 4060 adam ýaqytsha jumys oryndaryna jiberilgen. Ótken jyly jumyssyzdarǵa jáne ózin-ózi jumyspen qamtyp júrgen azamattarǵa nesıe berý maqsatynda búdjetten birinshi ret qomaqty qarajat bólingen bolatyn. Bul múmkindikti paıdalanǵan 43 adamǵa 662 mıllıon teńge kóleminde shaǵyn nesıe berilipti. Al bıylǵy jyly jumyssyz jáne ózin-ózi jumyspen qamtyp júrgen 150 azamatqa 100 AEK kóleminde grant berý qarastyrylyp otyr eken. Jańa formattaǵy áleýmettik kómek qalamyzdaǵy 287 otbasyna taǵaıyndalypty. Áńgime barysynda ózderiniń áleýmettik mártebelerin anyqtamaýǵa asyǵystyq tanytpaı júrgen azamattar máselesi de sóz boldy. Olar ózderiniń tabys kózin jasyrǵanmen, ózderine tıesili áleýmettik ıgilikterdi paıdalanýdan tys qalady. Zeınetaqy qoryna, MÁMS qoryna jarna tóleýden qalyp qoıady. Al bul degenińiz, eń aldymen, adamnyń óziniń jeke basyna kóptegen kedergi keltiredi Ózderińiz bilesizder, keler jyldan bastap medısınalyq saqtandyrý júıesi endiriletin bolsa, jumyssyz retinde tirkelmegen azamattar medısınalyq kómekten syrt qalyp qoıýy múmkin deıdi, – Almaty qalalyq Jumyspen qamtý basqarmasynyń basshysy Meıirjan Batyrbekuly. Qazir Almaty qalasy boıynsha áleýmettik mártebesi anyqtalmaǵan azamattardyń 600-i ǵana kelip, jumyssyz retinde tirkelgenin aıtqan Almaty qalalyq Jumyspen qamtý ortalyǵynyń dırektory Meıram Súıindikov azamattardy áleýmettik mártebelirin anyqtap, memleket tarapynan kórsetilip otyrǵan qoldaýlarǵa qol jetkizýlerin eskertti. M.Otynshıev óz sózin kúni keshe ǵana tusaýy kesilgen «Belsendi uzaq ómir súrý» jol kartasy tóńiregindegi jaqsy áńgimelerimen qorytyndylady. Bul jıynnan túıgenimiz, endi áleýmettik jaǵynan az qamtamasyz etilgen qala turǵyndary járdemaqyǵa arqa súıemeı, eńbek etýge beıimdelmek. Tıisti sala qyzmetkerleri usynǵan jumystan bas tartqan jaǵdaıda, eńbekke qabiletti músheleri bar otbasy áleýmettik kómekten qur qalýy da ábden múmkin kórinedi. Atalǵan jańa júıe áleýmettik kómek alýshylardyń áleýmettik jaýapkershiliginiń ósýine, jumys izdeýge jáne ózin-ózi qamtamasyz etýge degen qulshynystaryn arttyrýǵa, sondaı-aq, az qamtylǵan azamattardyń el ekonomıkasyna jáne qoǵam ómirine qatysý deńgeıin arttyrýǵa yqpal etedi, deıdi halyqtyń áleýmettik ahýalyna jaýapty sala basshylary.
