Ońtústik Qazaqstan oblysy Arys qalasynda ótken jyly 985 mln teńgege 25760 sharshy metr turǵyn úı salynyp, paıdalanýǵa berilgen. Aǵymdaǵy jyly bul meje artyǵymen oryndalatyn bolady. Bıyl jeke sektordan bólek, kópqabatty turǵyn úılerden 5900 sharshy metr páter el ıgiligine beriledi. Búgin bul týraly OQO óńirlik komýnıkasıalar qyzmetinde ótken brıfıńte Arys qalasynyń ákimi Murat Qadyrbek málim etti.

Aýdan basshysynyń aıtýynsha, ótken jyly aımaqta óndirilgen jalpy ishki ónim kólemi 32,8 mlrd teńgeni quraǵan. Al aǵymdaǵy jyly qala ekonomıkasynyń ishki ónim kólemin 33,8 mlrd teńgege jetkizý josparlanýda.

«Byltyr qalanyń ónerkásip kásiporyndarynda 8 mlrd 782 mln teńgeniń ónimi óndirilip, ónerkásip óniminiń naqty kólem ındeksi  104,6 paıyzdy qurady. Aǵymdaǵy jyly ónerkásip óniminiń naqty kólem ındeksin 105 paıyzǵa jetkizý kózdelip otyr. Sondaı-aq, óńir kásipkerligin qoldaý kartasy aıasynda 2018 jyly jalpy quny 8 mlrd 680 mln teńgeni quraıtyn 8 joba iske qosylyp, 172 jumys oryndary ashylatyn bolady», - dedi Murat Bolatuly.

Budan ózge, ótken jyly aımaqta negizgi kapıtalǵa tartylǵan jalpy ınvestısıa kólemi 5 mlrd 831 mln teńgege jetti. Ónerkásip, shaǵyn jáne orta kásipkerlik, týrızm jáne aýyl sharýashylyǵysalalarynda iske asyrylatyn jobalardyń esebinen 2018 jyly búdjettik emes ınvestısıa kólemi 2 mlrd 864 mln teńgeni quraıdy dep josparlanǵan.

«Bıznestiń jol kartasy 2020» bıznesti qoldaý men damytýdyń biryńǵaı baǵdarlamasy aıasynda 3 jobaǵa qoldaý kórsetilipti. 2018 jyly atalǵan baǵdarlama aıasynda 7 jobaǵa qoldaý kórsetiletin bolady. Onyń 3-i sýbsıdıalaý, 2-i kepildendirý, 1 grant, 1 ınfraqurylym boıynsha júzege aspaq.

Sonymen qatar, ótken jyly óńirdegi aýyl sharýashylyq óniminiń kólemi 13 mlrd 142 mln teńgeni qurap, naqty kólem ındeksi 110,6 paıyzǵa jetken. Sondaı-aq, byltyr jylyjaı alańy 3,1 gektarǵa artsa, aǵymdaǵy jyly 6 gektarǵa jylyjaı salý josparlanýda.