QR Parlamenti májilisiniń depýtattary bilimniń qara shańyraǵy Abaı atyndaǵy Qazaq Ulttyq pedagogıkalyq ýnıversıtetinde bolyp, ujymmen, stýdentter qaýymymen kezdesti.
Aldymen halyq qalaýlylary Serik Seıdýmanov pen Erjan Qudaıbergen oqý ordasynyń 90 jyldyq mereıtoıymen quttyqtap, ýnıversıtet rektory Takır Balyqbaevqa shyǵarmashylyq tabys tiledi. Osydan soń el ómirine oń ózgeris, jańa serpin ala kelgen «Elbasynyń bes áleýmettik bastamasyna qatysty túsindirý jumystaryn bastady. Bul bes bastamanyń qaı-qaısysyn alsańyz da, halyqtyń janyna jaqyn ári búgingi eń ózekti máselelerden shyǵýdyń tóte joly ispetti. Sondyqtan sóz kezegin alǵan Serik Seıdýmanov «Búgingi kúni elimizde baspanaǵa muqtaj azamattardyń sany 14 paıyzdy qurap otyrǵanyn, áleýmettik bastama osy azamattardyń barlyǵyn turǵyn úımen qamtamasyz etýdi kózdeıtinin aıta kelip: «Bul baǵdarlama uzaq merzimge arnalǵan. Halyqty tolǵandyrǵan másele tolyq sheshilmeıinshe jumys isteıtin bolamyz. Degenmen, 2023 jylǵa qaraı baǵdarlamanyń negizgi parametrleri oryndala bastaıtynyna kúmán joq», – dedi. Ol sondaı-aq, baspanalardyń bir qolǵa ótip ketpeýin qadaǵalaý maqsatynda tıisti shekteýler qoıylyp otyrǵanyn da tilge tıek etti.
Sonymen qatar, turǵyn úı salý jumystaryna, negizinen, memlekettik jáne jekemenshik seriktestikti damytý arqyly qol jetkizý kózdelip otyrǵany belgili. Osy máselege toqtalǵan depýtat Erjan Qudaıbergen baǵdarlamany aýyldyq jerge de ıkemdeý kerektigin sóz etti. «Aýyldyq jerde kóp qabatty turǵyn úı sala almaıtynymyz belgili. Sondyqtan ol jaqta jeke baspana salý, jas mamandarǵa jaǵdaı jasaý jóninde «Turǵyn-úı qurylys jınaq bankiniń» basshylarymen kelissóz júrgizip, tapsyrma berdik. Sizder mamandyq alyp, aýylǵa barǵanda, máselelerińiz sheshiledi dep oılaımyn», – dedi stýdentterge.
Bastamadaǵy basty másele – Elbasy aıtqan stýdentterge jataqhana salý jaıy. Qazirgi tańda elimiz boıynsha stýdentterge 707 myń oryn jetispeıdi, onyń 21,5 myńy Almatynyń úlesine tıedi eken. Jańa bastama boıynsha 2022 jylǵa deıin árqaısysy shamamen 500 orynǵa arnalǵan 150 jataqhana salý kózdelýde. Ýnıversıtet rektory Prezıdenttiń bul bastamasyn qoldaıtynyn jáne jataqhana salýǵa daıyndyq jumystarynyń júrgizilip jatqanyn jetkizdi.
