Agrarlyq bilimniń qara shańyraǵy Qazaq Ulttyq agrarlyq ýnıversıteti ujymy taǵy bir tamasha jıynnyń kýási boldy. QR Parlament Májilisiniń depýtattary Elbasynyń áleýmettik bes bastamasyn halyqqa túsindirý maqsatynda agrarlyq ýnıver­sıtetke atbasyn buryp, bilim alyp jatqan stýdent­terdiń tynys-tirshiligimen tanysyp, jataqhanalardy aralap kórdi.

Ýnıversıtet janyndaǵy Halyqaralyq Agrotehnologıalyq hab quramyna kiretin ınovasıalyq ortalyqtar men zertteý-zerthanalaryn aralap, «N.Nazarbaev bilim jáne ǵylym ortalyǵynyń» ashylý saltanatyna qatysty.

Ýnıversıtet rektory, QR UǴA akade­mıgi Tilektes Espolov qonaqtarǵa oqý ornynyń búgingi jetistikteri men aldaǵy maqsattary týraly baıandap, «Prezıdenttiń bes áleýmettik bastamasyn» iske asyrýǵa baılanysty ýnıversıtet boıynsha ázir­lengen jumys jospary aıasynda atqary­lyp jatqan naqty is-sharalar barysy týraly áńgimeledi. Osydan soń ýnıver­sıtetke arnaıy kelgen halyq qalaýlylary – QR Parlamenti Májilisi tóraǵasynyń orynbasary, «Nur Otan» Partıasynyń Májilistegi Fraksıasynyń jetekshisi – Gúlmıra Esimbaeva, QR Parlamenti Máji­lisi áleýmettik-mádenı damý komıtetiniń tóraıymy, «Nur Otan» partıasynyń Májilistegi Fraksıasynyń múshesi – Gúlnar Yqsanova, QR Parlamenti Máji­lisiniń depýtaty, «Nur Otan» Partıasynyń Májilistegi Fraksıasynyń múshesi Záýresh Amanjolova jumys saparlaryn ýnıversıtet janyndaǵy stýdentter úıin aralaýdan bastap,  bólmelerge bas suǵyp, olardyń jáı-kúıimen tanysty.

Májilis depýtattarymen birge «Nur Otan» partıasynyń Almaty qalasy fılıaly tóraǵasynyń birinshi orynbasary Juldyz Omarbek, Almaty qalasy máslı­hatynyń depýtaty, «Nur Otan» partıasy­nyń Almaty qalasy fılıaly tóraǵasynyń orynbasary Stanıslav Kankýrov jáne basqa da laýazymdy azamattar boldy.

Qonaqtar stýdenttik úılerdegi jaǵdaı­men tanysyp shyqqannan keıin, ýnı­versıtettiń bas ǵımaratyndaǵy Májilis zalynda arnaıy basqosý ótti. Jıyndy ýnıversıtet rektory, akademık Tilektes Espolov ashyp, júrgizip otyrdy:

– Qazaq Ulttyq agrarlyq ýnıversı­tetiniń ujymy Elbasy Úndeýindegi mańyzdy bes bastamany qoldap, onda aıtylǵan ózekti máselelerdi erekshe yqylaspen qabyldady. Elbasy Úndeýinde memlekettik-jekemenshik seriktestiktiń qatysýymen 75 myń orynǵa arnalǵan stýdenttik jataqhanalardy 2020 jylǵa deıin salý josparlaǵany týraly aıtyldy. Bul, ásirese, 98% aýyl balalary bilim alatyn bizdiń ýnıversıtetimiz úshin qýana qabyldaıtyn jańa bastama bolyp tur. Búgingi tańda ýnıversıtetimizde stýdent­terdiń 40% ǵana jatyn oryndarmen qamtamasyz etilgen. Áli de 2000-nan asa stýdentimiz jataqhanaǵa muqtaj. Osyǵan baılanysty ýnıversıtet tarapynan quzy­retti oryndarǵa arnaıy usynys jasalyp, jańa úlgidegi zamanaýı jataqhana quryly­synyń jobasyn ázirlendi, – dedi rektor.

Kezdesý barysynda QR Parlamenti Májilisi tóraǵasynyń orynbasary, Gúlmıra Esimbaeva Memleket basshysynyń egemen elimizdiń kemel keleshegin qamta­masyz etý jolyndaǵy eren eńbegin erekshe atap ótip, Elbasy usynǵan áleýmettik bes bastamanyń mańyzyna toqtalyp, stýdent­termen pikirlesti:

– Otandyq aýyl sharýashylyq bilimi men ǵylymynyń kóshbasshysy, toqsan jyldyq tarıhy bar  – Qazaq Ulttyq agrarlyq ýnıversıtetinde atqarylyp jatqan aýqymdy jumystarmen tanysa otyryp, kóz jetkizgenimiz –  bul oqý ordasynda jastarymyzdyń ozyq bilim alyp, zamanaýı ǵylymmen aınalysýyna barlyq jaǵdaı qarastyrylǵan eken. Jataqhanalardy aralap, stýdentterdiń jaǵdaılaryn óz kózimizben kórip, ótinish, tilekterin tyńdadyq. Ǵylymı ortalyq­tardy, zerthanalardy aralap, jas ǵalym­dardyń ǵylymı jobalardy oryndaý prosesterine kýá boldyq. Alǵyr da bilimdi jastarymyz janyp tur! Elbasymyzdyń bes bastamasyn biz olarǵa emes, olar bizge túsindirip berdi desek te bolady, – dedi halyq qalaýlysy Gúlmıra Estaıbekqyzy.

Jıynda QazUAÝ-dyń Strategıalyq damý basqarmasynyń basshysy, ekonomıka ǵylymynyń doktory, profesor Úkilaı Kerımova, Damý jobalaryn basqarý basqarmasynyń basshysy, ekonomıka ǵylymynyń kandıdaty, profesor Gúlmıra Nurmanbekova syndy ǵalymdar men belsendi stýdentter sóz sóılep, Elbasynyń bes bastamasyna qatysty oı-pikirlerimen bólisti.

Dál osy kúni, qonaqtar ýnıversıtet janyndaǵy «N.Nazarbaev bilim jáne ǵylym ortalyǵynyń» ashylý saltanatyna qatysyp, ortalyqtyń jastardy tárbıeleý­ge zor yqpal jasaıtynyn atap ótti. Orta­lyqta zamanǵa saı jabdyqtalǵan Elbasy kitaphanasy, Elbasy murajaıy, «Dostyq» stýdenttik assambleıasy zaldary ornalas­qan.

Ýnıversıtettegi tárbıe jumysynyń basty baǵyty – Elbasy belgilep bergen «Máńgilik El» jalpyulttyq ıdeıasyn júzege asyrý aıasynda bolashaq mamandar­dy jan-jaqty damytýǵa arnalǵan O.Sú­leımenov atyndaǵy áleýmettik-gýmanıtar­lyq bilim berý jáne tárbıe ınstıtýty, «Rýhanı jańǵyrý» gýmanıtarlyq zertteý­ler ınstıtýty, Tárbıe jáne qoǵamdyq  jumystar jónindegi departamenti, «Qazaqstan joly» tárbıe-bilim ortalyǵy, «Zıaly qazaq» debat ortalyǵy jáne basqa da stýdenttik jastar uıymdary aýqymdy jumystar júrgizip keledi.

Kezdesýden keıin qonaqtar stýdentter tarapynan túsken usynys-pikirlerdi tıisti oryndarǵa joldaıtyndyqtaryn jetkizdi.

Almaty aqshamy