Almatyda bıylǵy jyl «Zeı­net­kerler jyly» bolyp jarıa­lanǵan. «Nur Otan» partıasy Almaty qalalyq fılıaly osy ataýly jyl aıasynda jáne «Ar­dagerlerdi ardaqtaıyq» partıa­lyq jobasy negizinde áleýmettik bastama kóterdi. Ol – megapolıs zeınetkerlerine arnal­ǵan tegin kompúterlik saýattylyq kýrs­tary. Halyqaralyq aqparat­tyq tehnologıalar ýnıversıteti men Almaty memlekettik polı­tehnı­kalyq koleji alǵashqylar bolyp qoldaǵan bul baǵdarlama Elbasy Joldaýyndaǵy «Sıfrly Qazaqstan» baǵytymen de astasyp jatyr. «Nur Otan» partıasy qalalyq fılıalynyń «E-nsionery» bastamaly jobasyna baılanysty baspasóz máslıhaty ótti.

 Elbasy Joldaýynda aıtylǵandaı, memlekettiń búgingi tańdaǵy damý talaptarynyń biri – qoǵam kompú­ter dáýirindegi sońǵy tehnıkalardy tolyq meńgerýi qajet. Osy baǵytta «Sıfrly Qazaqstan» baǵdarlamasy qolǵa alynyp, qyzmet kórsetý júıesi elektrondy formatqa kóshýde. Eldiń eń úlken megapolısi – Almaty bul baǵytta da kósh basynda bolyp, «Sıfrly Qazaqstan» baǵdarlamasyn júzege asyrýda.

«Nur Otan» partıasy Almaty qalalyq fılıalynyń bastamasymen jasalǵan «E-nsionery» jobasy da osy baǵyttaǵy mejeli túrde zeınet­kerlerge arnalǵan baǵdarlama. Búgin­de fılıaldyń bastamasyn Halyq­aralyq aqparattyq tehnologıalar ýnıversıteti men Almaty memlekettik polıtehnıkalyq koleji alǵashqy­lar bolyp qoldap, joba osy oqý oryndarynda júzege asýda.

«E-nsionery» baǵdarlamasy negizi­nen 50 jastan asqan, ıaǵnı almatylyq zeınetkerlerge arnalǵan. Baǵdarla­manyń bir kýrsy 40 saǵat, senbi, jeksenbi kúnderi ótkiziledi. Bir jarym aıda kýrstan ótip, kompú­terlik baǵdarlamalardy meńgerip shyqqan tyńdaýshylarǵa tıisinshe sertıfıkat beriledi.

Baǵdarlamany partıa fılıaly qalalyq Jumyspen qamtý jáne áleýmettik qamsyzdandyrý basqar­masy arqyly júzege asyrýda. Iaǵnı basqarmanyń aýdandyq bólimderiniń bergen tizimi boıynsha baǵdarlama qatysýshylary kýrstardan ótedi. «E-nsionery» baǵdarlamasy boıynsha kompúterlik saýattylyq sabaǵyna qatysqysy kelgen zeınetkerler aýdandyq áleýmettik bólimderge habarlassa bolady. Tegin kýrstar eki deńgeıli. Tyńdaýshylar birinshi ke­zeńde kompúterdiń bazalyq baǵdar­lamalary boıynsha saýat ashsa, ekinshi kezeńde grafıkalyq baǵdarla­malar jasap, veb-saıttar ashý, ınter­net arqyly saýda jasaý sıaqty kúrdeli baǵdarlamalardy meńgeredi.

Qaıym-Munar Tábeev,

«Nur Otan» partıasy Almaty fılıaly tóraǵasynyń orynbasary:

– «E-nsionery» baǵdarlamasy partıanyń «Ardagerlerdi ardaq­taıyq», t.b. áleýmettik jobalarynyń aıasynda jasalyp, qoldaý taýyp otyr. Jobany júzege asyrýǵa İT ýnıver­sıtet pen Polıtehnıkalyq kolej­den basqa da Almatydaǵy oqý oryndary atsalysady dep oılaımyn. Eń bastysy, joba bir rettik nemese maýsymdyq emes, biz megapolıstiń kýrstan ótkisi kelgen barlyq zeınet­kerlerin qamtımyz dep oılaımyn.

Damır Shynybekov,

Halyqaralyq aqparattyq tehnologıalar ýnıversıtetiniń rektory, Almaty qalalyq máslıhat depýtaty:

– Búgingi ómirdi sıfrlyq tehno­logıa buqaralyq aýqymda qamtyp otyr. Zamanaýı tehnolo­gıamen teń qadam basý qajettiligi Elbasy Jol­daýynda, «Sıfrly Qazaqstan» baǵ­darlamasynda aıtyl­ǵan. Osy tur­ǵydan kelgende, «Nur Otan» qalalyq fılıalynyń bastama­syn qoldaýdy jón dep taptyq. Baǵ­dar­lama mejeli túrde qoǵamnyń egde býynyna, ıaǵnı zeınetker­lerge arnal­ǵan. Boljam boıynsha 2025 jylǵa eldiń aǵa býyny, zeınetkerler halyq­tyń 11 paıyzyn quraıdy eken. Mine, osy býyn za­manaýı tehnolo­gıalyq saýatty bolýy kerek. Elbasy tapsyr­masyna oraı Qazaqstan aldaǵy jyl­darda álemniń tehnologıalyq damy­ǵan, aldyńǵy qatarly memleket­teriniń sanatynda bolýy kerek. Biz sol qatarǵa úlkenimiz de, kishimiz de sıfrly tehnologıany meńgergen qoǵam bolyp jetýimiz kerek.

Qazaqstannyń ekonomıkalyq, tehnologıalyq draıveri – Almaty «Sıfrly Qazaqstan» baǵdarlamasyn júzege asyrýda. Bul baǵyttaǵy bastamashylardyń biri –«Nur Otan» partıasy qalalyq fılıaly.