Maqtaral aýdanyn qalaı damytýǵa bolady? Óńirdiń áleýmettik-ekonomıkalyq ahýalyn jaqsartýdyń qandaı joldary bar? Myrzashól óńirindegi maqta daqylynyń bolashaǵy qandaı? El arasyndaǵy yntymaq, birlikti qalaı nyǵaıta alamyz? Osy jáne ózge de ózekti saýaldar Maqtaral aýdanynyń ákimi Jamantaı Beısenbaevtyń aýdan aqsaqaldarymen kezdesýinde talqylandy.
Sońǵy jyldary Myrzashól óńiriniń ekonomıkalyq damýy kórsetkishteri kóńil kónshitpeı otyrǵany jasyryn emes. Aımaqta iri kásiporyndar ashý, ındýstrıaldy-ınnovasıalyq jobalardy júzege asyrý jolynda birqatar qıyndyqtar bar. Investor tartý, shetelden qomaqty qarjy ákelý sekildi jaýapty isterde aýdannyń oblys ortalyǵynan shetqary ornalasqandyǵy, kóliktik-logıstıkalyq baılanystyń óz deńgeıinde damymaýy, temir jol, áýe qatynasy baılanystarynyń joqtyǵy edáýir kedergi keltirip otyrǵany ras.
Desek te, aýdanda aýyl sharýashylyǵy salasynda alǵa ilgerileýshilik baıqalady. Maqta egip, baqsha ónimderin ósirýde oblysta teńdesi joq aýdan dıhandary jyl saıyn jańa izdenisterge bet buryp keledi. Aǵyn sý tapshylyǵy, sýarmaly jerlerdiń sorlanýy, zıankesterdiń kóbeıýi sekildi túıtkildermen kúresýde aýdan eńbekkerleriniń eńbegi orasan. Osy jaıttardy tilge tıek etken aýdan ákimi Jamantaı Qanaıuly ómirlik tájirıbesi baı, agro salanyń naǵyz mamandary bolǵan aqsaqaldardy áńgimege tartty.
Óz kezeginde sóz alǵan aqsaqaldar jańadan taǵaıyndalǵan aýdan ákiminiń jumysyna sáttilik tilep, eldiń yntymaǵy men birligin saqtaýda jan aıamaı qyzmet etýge shaqyrdy. Osy rette olar bir aýyzdan aýdan basshysyna qoldaý bildiretindikterin jetkizdi.
Sondaı-aq aqsaqaldar aldaǵy jyldary aýdandaǵy egistik jerlerdi ártaraptandyrý máselelerine mán berý kerektigine toqtaldy. Sońǵy jyldary aýdanda maqta egistiginiń kólemi qysqaryp kele jatqany baıqalady. Sebebi, aq altyn egip, ósirýdiń, kútip-baptaýdyń jyl saıyn qıyndaı túskeni jasyryn emes. Tipti sharýalar shyǵynyn óteı almaı, qınalǵan kezeńderdiń týyndaǵanyn da eske aldy. Máseleniń mán jaıyn baǵamdaǵan aýdan ákimi aldaǵy ýaqytta óńirden júgeri, jańǵaq, qarqyndy baý egý jumystary qarqyn alatynyn aıtty. Bıyldyń ózinde sharýalarǵa aýdanda 10 myń gektar aýmaqqa júgeri egý usynylyp otyr. Ony qaıta óńdeý isi de jandana túsetin bolady.
Budan bólek, jylyjaılar kólemi artyp, tamshylatyp sýarý ádisin keńinen qoldaný josparlanýda. Sonymen qatar aýdannan iri taýyq fermasyn salý, qus sharýashylyǵymen aınalysatyn kooperatıv qurý jumystary da qolǵa alynatyn bolady.
Jıyndy qorytqan aýdan basshy aldaǵy josparlardy birlesip iske asyrýda óńir halqynyń aýyzbirshiligi, ymyraly yntymaǵy mańyzdy ról atqaratynyn eskerip, aqsaqaldardy el ishin yntymaqqa úndep júrýge shaqyrdy.
