Qordaǵy jarna senimdi qolda, onyń bolashaǵyna alańdaýdyń qajeti joq, – deıdi Almaty óńirlik komýnıkasıalar qyzmeti alańynda jýrnalısermen baspasóz brıfıńin ótkizgen Biryńǵaı jınaqtaýshy zeınetaqy qorynyń basshylary.
Osydan jıyrma jyl buryn qurylyp, erteń zeınet jasyna jetkende emin-erkin ómir súrýdi qamtamasyz etedi dep úmittendirgen Biryńǵaı jınaqtaýshy zeınetaqy qory tóńireginde búginde alypqashpa áńgimeniń órip júrgeni jasyryn emes. Tipti, sol qordaǵy azyn-aýlaq qarajattaryn alyp, jumsaımyz degenge jurttyń kóbiniń senimi de az. Óıtkeni, 2018 jyldyń 1 qańtarynan bastap áıelderdiń zeınet jasy jarty jylǵa uzartylsa, azamattarymyzdyń BJZQ jınaǵan jarnany berý tásilderi de ózgertildi. Demek, jańa jyldan bastap salymshylar qordaǵy jarnasyn burynǵydaı birneshe ret bólip emes, ol endi aı saıyn bólip tólenetin boldy. «Bul sheteldik tájirıbede bar tásil, sondyqtan biz halyqtyń qarttyǵyn qamtamasyz etý maqsatynda osyndaı qadamǵa baryp otyrmyz», – degen edi, halyqtyń áleýmettik jaǵdaıyna jaýapty mınıstrliktiń ókilderi halyqpen túsindirý jumystaryn júrgizgen kezekti bir kezdesýlerinde. Bir qaraǵanda, durys sheshim de shyǵar, deıturǵanmen, bul halyqtyń óz erkimen tirnektep jınaǵan azyn-aýlaq bolsa da qory edi ǵoı, ony bir kúnde nemese bir jyl ishinde qoldanyp, bir keregine jumsasa da óz erkindegi sharýa edi ǵoı deısiń ǵoı. Almaty qalasy óńirlik kommýnıkasıalar qyzmeti ortalyǵynda bolǵan jýrnalısermen bolǵan brıfıńke qatysqan BJZQ AQ Óńirlik jelini damytý jáne ilespe qyzmet kórsetý departamentiniń basshysy Mámıla Musabekova jáne qordyń Almaty bólimshesiniń basshysy Nurlan Ámirenov jurttyń kókeıindegi kóp saýalǵa jaýap berip, qazirgi tańda qorda atqarylyp jatqan jumystary, ásirese, sıfrly Qazaqstan baǵytynda júrgizilip otyrǵan jumystary jóninde aıtyp berdi. Qordyń Óńirlik jelilerdi damytý jáne ilespe qyzmet qyzmet kórsetý departamentiniń basshysy Mámıla Qurmanjanqyzynyń aıtýynsha, ústimizdegi jyldyń 1 qańtardaǵy jaǵdaıy boıynsha zeınetaqy jınaqtarynyń jalpy somasy 7,78 trıllıon teńgeni qurap, qordaǵy jınaqtalǵan jarna mólsheri ótken jyldyń osy merzimimen salystyrǵanda 1,1 trıllıonǵa artqan. Sonyń nátıjesinde bir jyl ishindegi qordaǵy jarna ósimi 16 paıyzdy qurap, jalpy ishki ónimniń 15 ,1 paıyzyn qurapty.
Departament dırektory Mámıla Qurmanjanqyzynyń aqparatynsha, ótken jyly salymshylarǵa 169,69 mıllıard teńge tólense, onyń 22,69 mıllıardy saqtandyrý uıymdaryna aýdarylǵan. Halyqtyń jınaqtaýshy zeınetaqy júıesine degen senimin arttyrý maqsatynda 2017 jyly halyqtyń qarjylyq-quqyqtyq saýattylyǵyn kóterý jáne sapaly zeınetaqy qyzmetterin kórsetý boıynsha kóptegen jumystar atqarylǵan.
Qordyń barlyq fılıaldarynda toqsan saıyn «Ashyq esik kúnderi» ótkizilip, salymshylardyń zeınetaqymen qamsyzdandyrý boıynsha berilgen ózekti saýaldaryna tolyq jaýap berilgen. Astana, Almaty qalalarynyń jáne 14 oblystyń ákimdikterimen Yntymaqtastyq jáne qarym-qatynas týraly memorandýmdarǵa qol qoıyldy, – deıdi M.Musabekova. Departament basshysy, sondaı-aq, salymshylardyń sany men qorǵa salynǵan jarna mólsheri boıynsha Almaty qalasynyń aldyńǵy orynda turǵanyn atap ótti.
Qor qyzmetin ashyq etý maqsatynda Qoǵamdyq keńes qurylǵanyn da baspasóz máslıhatyna qatysýshylar tilge tıek etti. «Mobıldik keńse», qor saıtynda elektrondyq qyzmet kórsetý iske qosylǵaly beri 2298 salymshy onlaın tártibinde jeke zeınetaqy shotyn ashsa, 987 alýshy zeınetaqy tólemderin taǵaıyndaý jóninde ótinish beripti. Qazir jaýapty bólimsheler Qoǵamdyq keńes múshelerimen birlesip, óz-ózin jumyspen qamtyǵan halyqty jınaqtaýshy júıege tartý boıynsha usynys daıyndap jatyr, – deıdi Mámıla Musabekova.
Jýrnalıser tarapynan qoıylǵan saýaldarǵa múmkindiginshe jaýap berýge tyrysqan búginde 18 fılıaly, 218 qyzmet kórsetý ortalyqtary bar BJZQ ókilderi qordaǵy jınaqtalǵan jarnanyń taǵdyryna halyqtyń alańdamaýyna, onyń senimdi qolda, qordyń senimdi seriktesi Ulttyq Banktiń ıeliginde ekendigin aıtty. Olaı bolsa, kóńilimizdegi kóp kúdikti seıiltip, erteńgi qarttyǵymyzdyń qamsyz ótetindigine biz de senim artaıyq.
Nurjamal Baısaqal
Almaty Aqshamy
