Ótken aptada QR Úkimetiniń kezekti otyrysy ótti. Onda sóz sóılegen Densaýlyq saqtaý mınıstri Eljan Birtanov Almaty qalasynda biriktirilgen ýnıversıtettik aýrýhana qurý jobasy boıynsha jumystar júrip jatqanyn atap aıtty.
Mınıstrdiń sózine súıensek, Almatyda qurylatyn ýnıversıtettik aýrýhana Memlekettik-jekemenshik áriptestik (MJÁ) boıynsha salynady eken. Onyń ústine, ol Almatydaǵy QazUMÝ janyndaǵy bes respýblıkalyq ǵylymı zertteý ortalyqtaryn yqpaldastyrý arqyly 1265 tósek orynǵa arnap salynatyn bolypty. Sóıtip, qazir bul jobany júzege asyrý Ulttyq Ekonomıka mınıstrliginiń ekonomıkalyq saraptamasynan ótý kezeńinde tur eken. Sondaı-aq, «Densaýlyq» atty elimizdegi densaýlyq saqtaýdy damytý memlekettik baǵdarlamasyn júzege asyrý maqsatynda Densaýlyq saqtaý mınıstrligimen kelise otyryp, óńir ákimdikterimen birge júıeni birte-birte qaıta qurý jáne 2025 jylǵa deıingi uzaq merzimdi kezeńde ınvestısıalyq qajettilikti sheshý turǵysynda bıyldan bastap ambýlatorıalyq deńgeıdegi emhanalyq sektordyń óńirlik bolashaq josparlary negizinde ınvestısıany josparlaý júıesin engizý jumystary júrip jatyr. Sonymen qatar, stasıonarlyq deńgeıde halyqaralyq qarjy uıymdarymen birlese otyryp, MJÁ-niń úzdik ınfraqurylymdyq tájirıbesi modelin qoldaný usynylyp otyr.
