Astana qalalyq İİD Tergeý basqarmasy IELTS halyqaralyq sertıfıkatyn qoldan jasaý faktisi boıynsha tergeý sharalaryn jalǵastyrýda, dep habarlaıdy Qamshy.kz aqparat agenttigi QazAqparatqa silteme jasap.
Atalǵan vedomstvonyń málimetinshe, «Astana» medısınalyq ýnıversıteti stýdentteriniń halyqaralyq sertıfıkatty qoldan jasaý faktisi boıynsha 27 qylmystyq iske sot sheshimi shyqqan. «QR Qylmystyq kodeksiniń 385 baby boıynsha 27 qylmystyq is sotqa jiberilip, sot sheshimi shyqty. Qalǵandary boıynsha prosesýaldyq sheshim qysqa ýaqyttyń ishine qabyldanatyn bolady. İİD basshylyǵy tergeý barysyn baqylaýǵa aldy», — dep atap ótedi baspasóz qyzmeti.
Budan buryn habarlanǵandaı, «Astana medısına ýnıversıteti» AQ-ǵa túsý úshin IELTS sertıfıkatyn satyp alǵan 100-den astam stýdent oqýdan shyǵaryldy. 2017 jyldyń kúzinde emtıhandy óz kúshimen tapsyrǵandar jalǵan sertıfıkat usynǵandardyń baryna shaǵymdanyp, aryz túsirgen bolatyn. Oǵan sáıkes tekseris júrgizilip, nátıjesinde aǵylshyn tilin bilý deńgeıi boıynsha tirkelmegen 117 sertıfıkat anyqtaldy. Keıin QR Bilim jáne ǵylym mınıstri Erlan Saǵadıev bul máselege qatysty pikir bildirip, tıisti komısıa qurylatyndyǵyn málim etti.
«Byltyr biz atalǵan ýnıversıtetke baryp, jumystaryn tekserip, olarǵa balalardy oqýdan bosatý boıynsha nusqama berdik. Bul nusqama ishinara oryndaldy. Stýdentterdiń bir bóligi ózderiniń quqyqtaryn qorǵaý aıasynda sotqa júgindi. Degenmen de, nusqama oryndalýy tıis. Bul ýnıversıtet stýdentterdi oqýdan bosatýyn durys sheshim dep sanaımyz. Endi biz Densaýlyq saqtaý mınıstrligimen jáne ýnıversıtetpen birge tıisti komısıany qurýymyz kerek. Osy oraıda oqý orny men stýdentterge qatysty qandaı quqyqtyq qadamdar qabyldaý kerektigin talqylaý mańyzdy», - dedi Saǵadıev.
Al búgin baspasóz máslıhaty barysynda Astana medısına ýnıversıtetiniń rektory Májıt Shaıdarov jalǵan sertıfıkatpen magıstratýra, rezıdentýra jáne doktorantýraǵa túskenderdiń tizimi jarıalanatyndyǵyn aıtqan edi. Sonymen qatar atalǵan bilim ordasynyń Joǵary oqý ornynan keıingi bilim fakúltetiniń dekany Ernar Tursynbet oqýdan shyǵarylǵan bilim alýshylarǵa qansha qarjy shyǵyndalǵandyǵyn jarıa etti.
