Búgin "Nur Otan" partıasy janyndaǵy "Mıras" respýblıkalyq keńesiniń músheleri Almaty qalasyndaǵy ýnıversıtetterdiń stýdentterimen kezdesip, Elbasynyń 5 áleýmettik bastamasy aıasynda salynatyn jataqhanalardyń jobasymen tanysty.
Keńes músheleri Almatydaǵy ál-Farabı atyndaǵy Qazaq ulttyq ýnıversıteti, Q. Sátbaev atyndaǵy Qazaq ulttyq tehnıkalyq zertteý ýnıversıteti, Abaı atyndaǵy Qazaq ulttyq pedagogıkalyq ýnıversıteti, Qazaq memlekettik qyzdar pedagogıkalyq ýnıversıtetteriniń stýdentterimen kezdesip, olardyń jataqhanadaǵy jaǵdaıymen tanysty.
Sondaı-aq ál-Farabı atyndaǵy QazUÝ-nyń stýdentter qalashyǵynda bolyp, jataqhanalardyń qurylys jobasymen tanysty.
Ýnıversıtet rektory Ǵalymqaıyr Mutanovtyń aıtýynsha, josparlanǵan jańa eki jataqhananyń qurylysyna orta eseppen 6-7 mıllıard teńge qarastyrylǵan. Olardyń jalpy aýdany 45 500 sharshy metrdi quraıtyn bolady, bólmeler sany - 543.
Atap ótilgendeı, árbir salynatyn sharshy metrge 450 AQSH dollarynan jumsalady. Májilis depýtaty Bekbolat Tileýhan bul sıfranyń Astanamen salystyrǵanda az ekendigin atap ótti.
"Sharshy metrine 450 AQSH dollarynan kelse, bul Astanamen salystyrǵanda túk emes. Elordada bir sharshy metrine 627 AQSH dollarynan jumsalyp otyr", - dedi ol.
Ulttyq ýnıversıtet basshysy Elbasynyń qoldaýymen bul joba aldaǵy bir aıda óz jumysyn bastaıtynyn jetkizdi. Onyń aıtýynsha, stýdentterdi jataqhanalarmen tolyqtaı qamtý arqyly shetelden keletin stýdentterdiń sanyn arttyrýǵa bolady. Qazirgi tańda, atalmysh JOO-da 1500-den astam sheteldik stýdent bilim alýda.
Sondaı-aq "Nur Otan" partıasynyń ókilderine QazUÝ-nyń stýdentter qalashyǵynda boı kóteretin №2 Ǵalymdar úıiniń qurylys jobasy tanystyryldy.
Aıta keteıik, elimiz JOO-larynda bilim alyp jatqan 530 myń stýdenttiń 204 myńy ózge eldi mekenderden kelgen jastar. Jataqhanalarǵa suranys Almaty qalasynda - 21 557, Astana qalasynda - 14 239, Qaraǵandy oblysynda 8253 adamǵa jetip otyr. Jalpy respýblıka boıynsha 77 500 stýdent jataqhanaǵa muqtaj.
Aıta ketsek, «Mıras keńesi – 2010 jyly 15 qazanda «Nur Otan» partıasy janynan qurylǵan konsýltatıvtik-keńesý organy. Qoǵamdyq keńes quramyna Qazaqstannyń belgili mádenıet jáne óner qaıratkerleri engen. Keńes Sheshimderi usynymdyq sıpatta bolyp keledi.
2014 jylǵy mamyrda partıanyń oblystyq fılıaldary janynan «Mıras» Qoǵamdyq keńesiniń aımaqtyq alańdaryn qurý jóninde jumys bastalyp ketti. Keńestik aımaqtyq alańy sondaı-aq ár aımaqta mádenıet, óner jáne bilim berý salalary ókilderiniń basyn qosyp, jergilikti jerde Qazaqstan Respýblıkasynyń mádenıet, óner, kınomatografıa, tarıhı-mádenı murasyn saqtaý jáne damytý salasyndaǵy memlekettik saıasatyn júzege asyrý boıynsha «Nur Otan» partıasynyń aımaqtyq fılıaldary, memlekettik organdar men azamattyq qoǵamdyq ıstıtýttary qyzmetteriniń biryńǵaı strategıasyn ázirleý maqsatynda qurylady.
Joldas Órisbaev
