Almaty qalasynyń ákimi Baýyrjan Baıbek kóshedegi zańsyz saýdamen kúres jalǵasa beretinin málimdedi.

Almatyda birneshe jyldan beri saýda dúńgirshekteri súrilip, zańsyz saýdamen kúres belsendi túrde jalǵasyp keledi.

«Kóleńkeli ekonomıka úlesin azaıtý maqsatynda biz qalany zańsyz saýda dúńgirshekteri men bılbordtardan, basqa da zańsyz dúnıelerden tazalaýdy qolǵa aldyq. «Jumys oryndary» dep kópshiliktiń aıtary túsinikti. Bizde saýda oryndarynda 27 myń sharshy metr bos jer tur. Biz nege qalany bazarǵa aınaldyrýymyz kerek? Onyń ústine ol jerdegi azyq-túlikten eshkim saqtandyrylmaǵan. Ol jerdegi jumysshylar eńbekaqyny konvertpen alady, zeınetaqy qoryna da eshteńe aýdarmaıdy», - dedi qala ákimi.

Onyń aıtýynsha, qolǵa alynǵan jumystar jalǵasa bermek. Kóleńkeli ekonomıkamen kúres jumystary  qala búdjetiniń qorjynyna túsetin qarjyny molaıtady, ol qarjy qala ınfraqurylymyna baǵyttalmaq.

«Biz shaǵyn jáne orta bıznesti qoldaı túsemiz, osy rette búrokratıalyq kedergilerdi qysqartyp, jemqorlyq jaǵdaılarynyń jolyn jabamyz. Bıznestiń damýy qala turmysynyń jaqsaryp, jumys oryndarynyń kóbeıýine negiz bolady», - dedi Baýyrjan Baıbek.