26 sáýirden 27-sine qaraǵan túni iri tehnologıalyq kompanıalardyń jelilik adresteri Roskomnadzordyń qara tizimine endi, dep jazady Qamshy.kz aqparat agenttigi.
Tizimde «Tvıtter», «Odnoklassnıkı», Yahoo! Jáne LiveInternet syndy 200-ge jýyq IP-adresi endi. Roskomnodzor buǵattalǵan jańa tizimdi ázirge jarıalaǵan joq.
Buǵan deıin Máskeýdiń Tagansk aýdandyq soty 13 sáýir kúni Reseı aýmaǵynda Telegram messendjerin buǵattaý týraly sheshim shyǵarǵan. Sot sheshimi boıynsha, Telegram qyzmeti kompanıa «Federaldyq qaýipsizdik qyzmetiniń aqparatty shıfrlaý kiltin berý talabyn oryndaǵanǵa deıin» shektelmek.
Al 16 sáýirde sot sheshimimen Telegram messendjeri buǵattala bastaǵan. Roskomnadzor sonymen qatar tyıym salynǵan saıttarǵa kirý quraldaryna da tyıym salatynyn málimdedi.
Telegram-nyń negizin salýshy Pavel Dýrov «reseılikterdiń qupıa hat almasý quqyǵyn qaıtarýǵa kúresetinin» málimdegen. Onyń aıtýynsha, Telegram-ǵa tyıym salynsa, Reseıde ulttyq qaýipsizdik deńgeıi tómendep ketedi.
