Bul týraly 28 sáýir kúni Reseıdiń Federaldyq antımonopolıalyq qyzmetiniń basshysy Igor Artemev osy el premeri Dmıtrıı Medvedev qatysqan úkimet májilisiniń qortyndysy boıynsha brıfıńte aıtty. Onyń aıtýynsha, Qulybaev Reseı-Fınlándıa shekarasynan 50 kılometr, al Sankt-Peterbýrgten 90 kılometr jerdegi Vysosk portyn baqylaý quqyǵyna ıe bolady. Alaıda porttyń satylýyna qatysty qarjy mólsheri aıtylmaǵan.
Reseı úkimetiniń resmı saıty "Bul Kedendik odaq aıasyndaǵy jumystardyń jalǵasy jáne qazaq ókiliniń Baltyqtaǵy salmaqty aktıvterdi satyp alýy bizdi qýantady" degen Igor Artemevtiń sózin keltirgen. Bul tusta reseılik sheneýnik quramyna Reseı bastaǵan Belarýs, Qazaqstan, Armenıa jáne Qyrǵyzstan kiretin Eýrazıa ekonomıkalyq odaǵyn meńzese kerek.
Baltyq teńizi porttary saıtynda Vysosk mańynda kómir termınaly, munaı ónimderin taratý-júkteý termınaly, syǵymdalǵan tabıǵı gaz júkteý termınaly jáne qashyqtan jasalǵan teńiz termınaly bar ekendigi aıtylady.Termınaldardyń ortaq shekarasy joq, kómir termınalyna avtomobıl jáne temirjol tóselgen.
Amerıkalyq Forbes jýrnaly Tımýr Qulybaevtyń dáýletin 3,2 mıllıard dollar dep baǵalaǵan. Jýrnaldyń málimetinshe, onyń jubaıy, prezıdent Nazarbaevtyń qyzy Dınara Qulybaeva ekeýiniń dáýletin qosqanda 6,4 mıllıard dollardan asady.
