Sırıa úkimeti áskeriniń Hama men Aleppo qalalary mańyndaǵy bekinisteri zymyranmen atqylandy. Shabýyldan japa shekkender týraly málimet joq. Áskerılerdiń aıtýynsha, osy shaharlardyń shetindegi qarý-jaraq qoımalary men Aleppo janyndaǵy áskerı áýejaı nysanaǵa alynǵan. Sonymen birge Bashar Asad jaǵynda soǵysyp jatqan ırandyq jasaqtar ornalasqan tus ta zardap shekti.
Alaıda bul soqqylardy kimniń júzege asyrǵany áli belgisiz. Qazir ol tekserilip jatyr.
Eske sala keteıik, sáýirdiń 14-i kúni AQSH, Ulybrıtanıa, Fransıa eli Sırıa úkimet áskeri Dýma qalasynda hımıalyq qarý qoldandy degen aıyppen osy eldiń aýmaǵyn zymyranmen atqylaǵan bolatyn. Ol kezde bul memleketter Damask mańyndaǵy ǵylymı-zertteý ortalyǵyn, áýe qorǵanys bazasyn, birneshe áýejaıdy jáne qarý-jaraq qoımalaryn kózdegen.
