Reseıdiń jańasha tarıhynda eki Borıs bar edi.
Biri – Borıs Elsın. Komýnıs boldy, biraq keıin sol komýnıstik partıamen kúresip, Reseıdi demokratıalyq jolǵa saldy. Kemshiligi de kóp boldy, biraq bárin bir áreketimen jýyp-shaıyp ketti: kúnniń bir kúninde: «Reseılikter, meni keshirińder!», - dep prezıdenttikten óz erkimen ketti.
Ekinshisi – Borıs Nemsov bolatyn. Elsınniń komandasynda vıse-premer bop qyzmet atqardy. Keıin opozısıa qatarynan tabyldy. Ol qazirgi reseılik demokratııalyq kúshteriniń eń tanymal tulǵasy edi. Basqalardan onyń bir ereksheligi sol – ol Pýtın jáne onyń jaqyn aınalasy týraly ashyq syn aıtty, sol mańaıdaǵy jemqorlyq jaıynda óz dálelderin jaıyp salǵan kitaptar jazdy. Bálkim, naq osy jaıt onyń taǵdyryna tikeleı áser etken bolar.
Kez kelgen avtorıtarlyq júıe óz ishindegi opozısıany kóre almaıdy, kórgisi kelmeıdi. Meılinshe tuqyrtyp, basyp-janshyp tastaýǵa tyrysady. Saıası kúrestiń barlyq aıla-amalyn paıdalanady: qaralaıdy, arandatady, sottap, túrmege jabady.
Avtorıtarlyq júıe kúsheıgen saıyn ondaı kúres ýshyǵa túsedi de, onyń sharyqtaý shegi - óz synshylaryn óltirýge ákep soǵady. Qazaqstanda da, Reseıde de bılik buryn da óziniń saıası qarsylastaryn qarsy oq atqan. Qarap otyrsaq, búgingi Reseıde bul dástúr óz jalǵasyn taýyp jatyr. Onyń sebebi de belgili – Batys sanksıalary kórshi eldiń ekonomıkasyn álsiretip jatyr, el ishindegi narazylyq ulǵaıýda. Bul tusta opozısıany qoldaýshylar kóbeıe túsetini belgili.
Bizdi de bolashaǵy buldyr, saıası turǵydan óliara shaq kútip otyrǵan sekildi. Eń bastysy – postnazarbaev kezeńindegi bas bılik úshin kúres erekshe asqyna túsedi, osy kezde toparalyq tartys óziniń sharyqtaý shegine jetedi. Bir Odaqqa kirgen Reseıdiń saıası tájirıbesin qaıtalaýdan Qudaı saqtasyn!
(Ámirjan Qosanovtyń fesbýktegi paraqshasynan)
Pikir qaldyrý