Sýdıa Naomı Reıs Býhvald "syn aıtýshylardyń akkaýnttaryn buǵattaý Konstıtýsıaǵa engizilgen ózgeristere qaıshy áreket" deıdi.

Sársenbi kúni Nú-Iork soty AQSH prezıdenti Donald Trampqa Twitter-de teris pikirler qaldyrǵandardyń paraqshalaryn buǵattaı almaıtyny týraly qaýly qabyldady.

Sýdıa Naomı Reıs Býhvaldtiń aıtýynsha, Tramtyń jazbalaryna syn aıtýshylar óz pikirlerin erkin jetkizýge quqyly. Eger Tramp olardy buǵattasa, Konstıtýsıadaǵy sóz bostandyǵyn buzǵan bolady.

Býhvald Twitter-diń ınteraktıvti orta ekenin eskertti. Onda kez kelgen adam Tramptyń ár jazbasyna túrli áser bildirýge quqyly. Al Tramp ár synı pikir qaldyrǵan jeli qoldanýshysyn buǵattap otyrsa, saıası dıskýssıany shekteıdi, sonymen qatar AQSH Konstıtýsıasyna qaıshy áreket etedi.

Trampqa synı pikir jazamyn dep akkaýnty buǵattalǵan azamat paraqshasyna Rım ákesi Fransısktiń Trampqa alańdap qarap otyrǵan qysqasha vıdeosyn jarıalap, mazmuynan «Búkil álem sizge osyndaı kózqaraspen qarap otyr» dep jazyp qoıǵan.

Aıta keteıik, AQSH-tyń arnaıy prokýrory Robert Múller bir jyldan asa ýaqyt boıy AQSH-ta 2016 jyly ótken  prezıdent saılaýyna Reseıdiń qatysy bar-joǵyn, buǵan qosa bul tergeýge Tramptyń bóget keltirý múmkindigin tekserip keledi. Osyǵan oraı prezıdentti synaýshylar kún saıyn artyp ári AQSH basshysyn kináli dep taýyp, Tramp pen onyń otbasy múshelerine túrme kıimin kıgizip qoıǵan. Endi biri  múltfılmderdegi kúlkili keıipkerlerge aınaldyrǵan.

Al prezıdenttiń jaqtaýshylary kerisinshe Tramptyń «Amerıka batyry» bolyp turǵan sýretterin jarıalap, 2020 jylǵy saılaýda da Trampty prezıdent retinde kórsetip álek.

Donald Tramp áleýmettik jelini belsendi qoldanatyn álemdegi jalǵyz prezıdent. Prezıdent Twitter jelisinde jıi otyrýyn "halyqpen jaqyn bolý úshin" dep túsindirgen edi.