Astana – Qazaqstan táýelsizdiginiń tuǵyry. Elimizdiń elordasy Aqmolaǵa qonys aýdarǵannan bergi ótken 20 jyl memleketimizdiń qaýipsizdigin, geosaıası erkindigin, terıtorıasynyń myzǵymastaı beriktigin, el ekonomıkasynyń qarqyndy damý strategıasyn qamtamasyz etken táýelsiz Qazaqstan tarıhyndaǵy betburys kezeń bolyp tabylady. Jıyrma jyl ishinde Astana Qazaqstannyń shynaıy táýelsizdigi men egemendigin pash etken memlekettik ortalyq bolyp tanyldy. Bolashaqta da eldiktiń eren elordasy – Astanada ǵasyrlar boıy Qazaqstan halqynyń azat oıy men múddeleri, asqaq armany men maqsattary is júzine asyryla beretin bolady.
Bıyl qala naǵyz «jasyl jelekke» aınalǵaly tur. Astana ákimdigi elordanyń 20 jyldyǵyna oraı qala aýmaǵyn jappaı kógaldandyryp, turǵyndarǵa yńǵaıly keńistik pen otbasylyq demalys ornyn jasaýǵa ekpin berip otyr, Qamshy.kz aqparat agenttigi elorda ákimdiginiń resmı saıtyna silteme jasap.
«Qalanyń oń jaǵalaýyn saıabaq pen gúlzarlar jasaý biz úshin óte mańyzdy. Eski súrilgen úılerdiń aımaǵyn biz komersıalyq nysandarǵa bermesten (turǵyn úı, meıramhana, qonaq úı), turǵyndardyń ótinishi boıynsha ol jerlerge balalar men úlkenderge arnalǵan sport alańy bar gúlzarlar men býlvarlar salamyz. Osy jyly oń jaǵalaýda 13 gúlzar, kelesi jyly 5 gúlzar jaıqalyp turmaq.
Botanıkalyq baq pen Lıneınyı saıabaǵy, «Araı» saıabaǵyn qaıta jóndeý jumystary aıaqtalýǵa taıap qaldy. Jalpy alǵanda 18 obektige 85 balalar oıyn atraksıony men 115 sport trenajeri, 18 fýtbol, basketbol, tenıs alańy, 17 km velojol, 30 sýburqaq kesheni, 12 km júgirý joly, 2 skeıt-alań salynady. Osynyń bári qaladaǵy ortanyń sapasyn jaqsartatynyna senimdimin», - dedi Áset Isekeshev jumys babymen qala aýmaǵyn aralaý barysynda.
Astana ákimi jaýapty tulǵalarǵa 1 shilde 2018 jylǵa deıin 7 saıabaq pen gúlzardyń qurylysyn aıaqtaýdy, al jyl sońyna deıin altaýyn, 2019 jyly 5 gúlzar men býlvardyń qurylysyna kirisý kerektigin tapsyrdy. Osy aıtylǵan saıabaqtar men gúlzarlarǵa 120 gektar jer bólindi.
Osy jáne kelesi jyly Astanada salynatyn árbir saıabaq pen býlvarlar belgili bir stılmen órnektelip, arnaıy taqyrypqa saı jasalynady. Elordanyń mereıtoıy qarsańynda Birjan sal kóshesindegi № 5 úıdiń mańaıyna salynyp jatqan gúlzardyń qurylysy aıaqtalady.
Qurylys barysynda gúlzar «Chemodan saıabaǵy» degen ataý aldy, sebebi onyń aýmaǵy temirjol vokzalynan alys emes jáne shaǵyn arhıtektýralyq formasy chemodan úlgisinde salynýda. Avtordyń oıynsha, munda balalar temirjoly paıda bolmaq. Sol sebepti qurylysshylar relsti tóseı bastady.
Taǵy bir gúlzar Pýshkın kóshesinde № 15 b úıiniń mańaıynda salynyp jatyr, ony «Qytaı qorǵany» dep ataıdy. Munda balalar alańy men sport trenajerleri ornatylady. Jergilikti turǵyndar atalmysh gúlzarda ulttyq asyq atý oıynyn da uıymdastyra alady.
Taǵy bir demalys orny Respýblıka men Dúkenuly dańǵylynyń qıylysynda salynyp, «Astronomdar men ǵaryshkerler gúlzary» degen ataýǵa ıe bolady. Munda skeıtdrom, qoǵamdyq tamaqtaný orny, Eıms - úshjaqty optıkalyq ıllúzıadan jasalǵan qısyq aınalar bólmesi ornalasady. Gúlzarda tóbeshik syrǵanaqtar men balalar alańshasy da umyt qalmaıdy.
2018 jyldyń sońyna deıin Maılın kóshesi, № 9 úıdiń janynda taǵy bir gúl baǵy boı kóteredi. Onyń aýmaǵyna fýtbol, basketbol, balalar oıyn alańy, trenajer jáne asyq oınaıtyn oryndar salynady. Saryarqa dańǵyly № 27 úı aýdanynda tastardan jasalǵan gúl baǵy paıda bolady.
Saıabaqtyń ishinde tastar óte kóp, syrttaı qaraǵanda japondyq tas saıabaǵyn eske salady. Budan basqa, gúlzarda saýda pavılondary, balalar oıyn alańy, sport trenajerleri de qarastyrylady. Osy aýdandaǵy № 23 úıdiń mańaıyna da matematıkalyq gúlbaq paıda bolady.
Joba boıynsha munda shahmat buryshy, sheshimin tappaǵan aleıa, «sınýsoıd taqtasy», balalar oıyn alańy, sport trenajeri, velosıpedshiler turaǵy qarastyryldy. Abaı dańǵylynda, Sembınov kóshesinen «Egemen Qazaqstan» gazeti kóshesine deıin salynatyn býlvarǵa «Teatrlanǵan» degen ataý berilip, ol jerge amfıteatr salynady.
Abaı dańǵyly boıynsha Kúltóbe kóshesi ýchaskesinen Sembınov kóshesine deıin, «Egemen Qazaqstan» gazetinen Beısekbaev kóshesine deıin «Ádebıet» býlvary paıda bolady. Bul býlvardyń syrttaı kórinisi kitap sıaqty bolady, al terıtorıasyna kitap sóreleri men oqyrmandar úshin oryndyqtar qoıylady. Býlvarda oıyn alańshalary men sport trenajerleri de ornalastyrylady.
Kenesary kóshesinde «Egemen Qazaqstan» gazeti kóshesinen Beısekbaev kóshesine deıin qoldanbaly óner býlvary paıda bolady. Munda ústel oıyndary, sýret salatyn qabyrǵalar, balalar oıyn alańshasy qarastyrylǵan. Sondaı-aq saýda pavılondaryna da ruqsat beriledi.
2019 jyly Astanada taǵy 4 gúlzar men bir býlvar ashylady. Onyń bári de Moldaǵulova kóshesine salynady. Jobanyń avtory shaǵyn arhıtektýralyq formany janýarlar men ósimdikter túrinde ornalastyryp shyǵady. Qalǵan gúlzarlar Jeńis dańǵyly, Esenberlın, Jeltoqsan kóshelerinde jasalady. Jańa býlvar Jeńis dańǵyly qıylysy men Jangeldın kóshesinde salynady.
Jobalaý-smetalyq qujatqa sáıkes, saıabaqtar men gúlzarlarda «1000 oryn kóshe saýdasy» baǵdarlamasy boıynsha saýda oryndary bólinedi. Osy maqsatta káriz, ınjenerlik jáne sý ótkizý jelileri, sýǵarý, jaryqtandyrý, shaǵyn arhıtektýralyq forma, gúlder men tal-aǵashtar otyrǵyzylady.
2018 jyly 386 myń aǵash otyrǵyzylady, onyń 208 myńy astananyń jasyl beldeýine, taǵy 178 myńy - gúlzar men saıabaqtardan oryn tabady. Ótken jyly jalpy otyrǵyzylǵan aǵashtardyń sany - 312 myń bolǵan.
