Vıdeo 2018 jyldyń 1 mamyrynda túsirilgen.

Sońǵy kúnderi Qyrǵyzstan men Qazaqstan áleýmettik jelilerinde áıeldiń jasqa da kelmegen sábıdi aıaýsyz soqqyǵa jyqqan vıdeosy taralǵan.

Vıdeodan áıeldiń sábıdi tepkilep, judyryǵymen arqasynan urǵanyn anyq baıqaýǵa bolady. Vıdeoǵa túsken ekinshi áıel qolyna pyshaq ustap tur, alaıda sýyq qarýmen ne istegeni belgisiz.

Jazba taraǵan ýaqytta QR İİM áıeldiń izdestirilip jatqanyn habarlaǵan. Qyrǵyzstan mınıstrligi de vıdeoǵa qatysty tekserý jumystaryna kirisken.

Qyrǵyzstandyq Kaktus.media bolǵan oqıǵaǵa qatysty shaǵyn zertteý júrgizip kórdi. Nátıjesinde vıdeonyń Qyrǵyzstan men Qazaqstanda túsirilmegeni anyqtaldy.

«Vıdeo montaj emes, shynaıy. Jazba 2018 jyldyń 1 mamyrynda túsirilgen. Oqıǵa Perýde oryn alypty. Alǵan jaraqattarynyń kesirinen sábı qaıtys boldy. Al ony soqqyǵa jyqqan áıel týǵan anasy bolyp shyqty. Vıdeoǵa túsirip turǵan balanyń ákesi eken», - delingen  Kaktus.media portalynyń málimetinde.

Portal derekterine sáıkes, vıdeo Perýdegi Iýngaıo qalasynda túsirilgen. Jas ata-ana polısıa bólimshesine 10 aılyq sábıdiń óli denesin ákeledi. Erli-zaıyptylardyń sózinshe, bala qatty aýryp, aýrýhanaǵa apara jatqan jolda kóz jumǵan.

Al polısıa bólimshesine máıithanaǵa joldama beretin qujattardy alýǵa barǵan kórinedi. Polıseıler tıisti qujattardy taýyp bergenimen er men áıelden kúdiktenip, suraý astyna alady. Tergeý ýaqyty aralyǵynda vıdeo áleýmettik jelide tarap úlgeredi. Jazba polısıanyń qolyna jetip, erli-zaıyptylar qamaýǵa alyndy.